Gúlshara Ábdihalyqovany "hannyń qyzy" dep ataǵan sózi arqyly biraz tanylǵan Qyzylorda obylsynyń turǵyny Sandýǵash Turlybekovanyń ustalýyna baılanysty derek shyqty.
Qyzylorda oblysy Jańaqorǵan aýdany polısıa bóliminiń málimetinshe, Sandýǵash Turlybekovanyń ústinen eki adam "bopsalaý" faktisi boıynsha aryzdanǵan.
"6 naýryzda Qyzylorda oblysynda azamatsha Turlybekovany ustaý deregi boıynsha tómendegini habarlaımyz. 28 aqpan jáne 6 naýryz kúnderi Qyzylorda oblysynyń Polısıa departamentine eki oblys turǵyny bul azamatshany qylmystyq jaýapkershilikke tartý týraly aryzben júgindi. Turlybekova bopsalaý arqyly jáne ar-namys pen qadir-qasıetke nuqsan keltiretin málimetterdi taratamyn dep qorqytyp, jábirlenýshilerden iri kólemde aqsha talap etkeni anyqtaldy. Bul derek boıynsha qylmystyq is qozǵaldy. Turlybekova aýyr qylmysqa kúdikteldi, budan bólek taǵy birneshe bopsalaý faktiler anyqtaldy jáne proseske qatysýshylardyń jaýaptaryn burmalaýǵa yqpal etip, tergeýdiń jan-jaqty júrgizilýine kedergi keltirý múmkin, osyǵan sáıkes tergeý sotymen oǵan qatysty kúzetpen ustaý sanksıalandy. Ustaý zań sheńberinde júrgizildi, arnaıy quraldar men jaýyngerlik ádister qoldanylǵan joq. Kúdikti ýaqytsha ustaý ızolátoryna qamaldy" delingen polısıa habarlamasynda.
Buǵan deıin áleýmettik jelilerde Sandýǵash Turlybekovany polısıa ustap áketip bara jatqany beınelengen foto taraǵan. Ol kezde quzyrly organdar mardymdy aqparat taratpaǵan bolatyn.
Sandýǵash Turlybekova Qyzylorda oblysynyń eks-ákimi Gúlshara Ábdihalyqovanyń Jańaqorǵan aýdanyna sapary barysynda polısıanyń joldy japqanyna narazylyq bildirip, "Joldy jabatyn hannyń qyzysyz ba?" degen sózinen keıin kópshilikke tanylyp ketken.
Pikir qaldyrý