Prezıdent Q.Toqaev kelesi jyly bolatyn Uly Jeńistiń 80 jyldyǵyna ázirlikti qazirden bastaý kerektigin aıtyp, Taldyqorǵandaǵy áýe bazasyn ushqysh Sergeı Lýganskııdiń atymen, «Aıbyn» ordenniń túrli dárejesin belgili batyrlardyń esimimen ataý bastamasyn kóterdi.

– Jeńistiń 80 jyldyǵyna oraı zertteýler tyń qarqynmen jalǵasady dep senemin. Surapyl soǵys kezindegi aǵa býynnyń óshpes erligi men eren eńbegin urpaq jadynda jańǵyrtý óte mańyzdy. Memleket bul baǵyttaǵy jumysty jalǵastyra beredi. Málik Ǵabdýllın, Sabyr Rahımov, Álıa Moldaǵulova, Mánshúk Mámetova jáne basqa da batyrlardyń esimi eldi mekenderge, túrli nysandarǵa, kóshelerge berilgen.

Bul baǵyttaǵy jumysty jalǵastyrý qajet. Osy oraıda, maıdan shebinde erekshe qaharmandyǵymen daralanǵan áıgili ushqysh, Keńes Odaǵynyń eki márte batyry Sergeı Lýganskııdiń erligi laıyqty baǵalanýǵa tıis. Almatynyń bir kóshesi osy qalada týǵan dańqty ushqyshtyń esimimen atalady. Qazaqstan áýe qorǵanysy kúshteriniń Taldyqorǵandaǵy áýe bazasyn da Sergeı Lýganskııdiń atymen ataǵan jón dep sanaımyn, – dedi ol ulttyq quryltaı otyrysynda.

Sondaı-aq prezıdent «Aıbyn» mártebeli ordenniń túrli dárejesin Saǵadat Nurmaǵambetovtiń, Baýyrjan Momyshulynyń jáne Raqymjan Qoshqarbaevtyń esimimen ataýdy usyndy.

– Bul tarıhı ádildikti qalpyna keltirý jolyndaǵy mańyzdy qadam bolmaq. Sol arqyly qaharmandarymyzdyń erligin urpaq jadynda jańǵyrtamyz. Bul bastama osy marapattyń mazmunyn baıyta túsedi. Halqymyzdyń birtýar perzentterine tán erlik rýhy osy ordenderdiń mártebesin bıiktetedi. Sondaı-aq nagrada ıegerlerine Otanymyzǵa qaltqysyz qyzmet etýge erekshe jiger beredi. Men buǵan kámil senemin, – dedi prezıdent.