Búgin Bas prokýratýra Qazaqstan Respýblıkasynyń İshki ister mınıstrligimen birlesip, asa iri mólsherde alaıaqtyq jasaǵany úshin qylmystyq jaýapkershilikke tartý maqsatynda Reseı Federasıasynan kúdikti ekstradısıalandy.

"Ol 2020-2023 jyldar aralyǵynda qurylys kompanıasynyń basshysy bola otyryp, Astana qalasynda premıým sanatyndaǵy páterlerdi salý jáne satý syltaýymen aldyn ala sóz baılasý arqyly adamdar tobynda 4,3 mlrd teńgeden astam somaǵa 200-den astam úleskerdiń aqshalaı qarajatyn urlap ketken. Qylmys jasaǵannan keıin kúdikti jasyrynyp, osyǵan baılanysty halyqaralyq izdestirý jarıalandy", – dep jazylǵan habarlamada.

Ótken jyldyń qarasha aıynda Qazaqstan Respýblıkasy Bas prokýratýrasynyń suraý salýy boıynsha bul tulǵa Reseı Federasıasynyń aýmaǵynda ustalyp, ony ekstradısıalaý týraly sheshim qabyldandy. Qazirgi ýaqytta ol tergeý ızolátoryna qamaldy.

Qylmystyq toptyń basqa sybaılas qatysýshylary ótken jyldyń sońynda ustalynyp, qazirdi tańda olarǵa qatysty tergeý amaldary júrgizilýde. Atalǵan qylmys jasaǵany úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy qarastyrylǵan.