Saýda jáne ıntegrasıa mınıstriniń mindetin atqarýshy Qaırat Tórebaev májilis kýlýarynda biryńǵaı ýaqyt beldeýin alyp tastap, burynǵy ýaqyt beldeýine qaıtyp kelýdi suraǵan petısıa týraly aıtty. 

Onyń aıtýynsha, 50 myńnan astam daýys jınalatyn bolsa, úkimet petısıany qarastyrýy múmkin. 

-Reglamentke sáıkes biz eń aldymen, petısıanyń nátıjesin kútýimiz qajet. Odan keıin muny jumysqa alamyz. Búginde bul týraly aıtý erte. Qazir mınıstrliktiń osyǵan qatysty ustanymyn aıtýǵa bolmaıdy. Ázirge basqa memlekettik organdarmen birlesip qabyldanǵan resmı pozısıany ustanyp otyrmyz. Bul máselege petısıa aıaqtalǵan soń oralamyz, bilýimshe, ol zańdy túrde osy jyldyń jeltoqsanyna deıin aıaqtalýǵa tıis", - deıdi.

Eske salsaq, bıyl 29 aqpanda Qazaqstan biryńǵaı UTC +5 ýaqyt beldeýine resmı túrde aýysqan bolatyn. Elimizdiń birneshe óńirinde ýaqyt bir saǵatqa artqa jyljydy. Atap aıtqanda, Astana, Almaty, Shymkent qalalarynda, Aqmola, Almaty, Jambyl, Qaraǵandy, Qostanaı, Pavlodar, Soltústik Qazaqstan, Túrkistan, Shyǵys Qazaqstan, Abaı, Jetisý, Ulytaý oblystarynda jergilikti ýaqyt bir saǵatqa artqa qoıyldy.