2024 jyldyń 14 mamyr kúni keshki ýaqytta «Jaskent bóbekjaı-baqshasy» JSHS «Qulynshaq» tobynyń tárbıelenýshisi Muhametqalı Aıaýlym Ádiletqyzynyń anasy G.Shaımerdenova qyzynyń aıaǵyndaǵy syrylǵan jaraqatty kóredi. «Jaskent bóbekjaı-baqshasy» JSHS-daǵy beınebaqylaý kameralarynan tárbıeshiniń qyzyna dene jaraqatyn salǵan is-áreketin anyqtaıdy. Eń soraqysy, ata-analar beınebaqylaý kamerasynan tárbıeshilerdiń tynysh otyrǵan balalardy sebepsiz uryp, tunshyqtyrǵandaryn kóredi. Tipti bul sumdyqty kórgen keıbir ata-analar talyp ta qalǵan.

Ata-analar bul oqıǵa boıynsha quqyq qorǵaý organdaryna habarlasty. 

Osyǵan qatysty Jetisý oblystyq polısıasy jaýap berdi.

«Bul derek boıynsha sotqa deıin tergeý bastaldy. Sot-medısınalyq saraptamasy taǵaıyndaldy. Atalǵan is oblystyq polısıa departamentiniń baqylaýynda», - delingen habarlamada.

Balabaqshada nebári 5 aı jumys istegen kúdikti buǵan deıin tárbıeshiniń kómekshisi bolǵan. Daý týdyrǵan jaǵdaıdan keıin balabaqsha ádiskeri, tárbıeshiniń kómekshisi jáne kúdiktiniń ózi jumystan qýyldy.