"Búgingi kezdesý Dostyq jáne yntymaqtastyq týraly kelisimniń 30 jyldyǵy qarsańynda ótip jatyr. Munyń sımvoldyq máni bar. Jaqynda ǵana áriptesim Rejep beımen telefon arqyly sóılestim. Biz únemi habarlasyp otyramyz. Sondyqtan eki el arasyndaǵy dıalog óte jaqsy damyp kele jatyr. Jalpy, Túrkıa – Qazaqstannyń eń iri bes saýda seriktesiniń biri. Sonymen qatar basty 10 ınvestordyń qataryna kiredi. Byltyr ekijaqty saýda-sattyq kólemi 6 mıllıard dollarǵa jetti. Biraq munymen toqtap qalýǵa bolmaıdy. Qarym-qatynasymyzdyń áleýeti óte zor. Sondyqtan keleshekte ózara saýda aınalymy 10 mıllıard dollarǵa jetetinine eshqandaı kúmánimiz joq", – dedi prezıdent.

Al Nýman Kýrtýlmýsh atajurtta túrik delegasıasyna kórsetilgen syı-qurmet úshin rızashylyǵyn bildirdi.

"Qazaqstan – bizdiń atajurtymyz ári túrki halqyna ortaq rýhanı tulǵa Qoja Ahmet Iasaýıdiń otany. Biz Túrkistan qalasyna jol júrip, qasıetti oryndarǵa zıarat etemiz jáne Qoja Ahmet Iasaýı atyndaǵy Qazaq-Túrik halyqaralyq ýnıversıtetinde konferensıa ótkizemiz. Qazaqstan sizdiń basshylyǵyńyzben damýdyń jańa kezeńine qadam basty. Elińizde tabysty saıası-ekonomıkalyq, áleýmettik reformalar júrip jatyr. Munyń bári Qazaqstannyń órkendeýine oń yqpalyn tıgizedi dep oılaımyn. Aldaǵy ýaqytta Túrkıa men Qazaqstan arasyndaǵy yntymaqtastyq odan ári nyǵaıa túsetinine senimdimin. Eki eldiń saýda, tehnologıa, ónerkásip, logıstıka, energetıka jáne aýyl sharýashylyǵy salalaryndaǵy áleýeti zor", – dedi Túrkıa Ulttyq májilisiniń tóraǵasy.

Qasym-Jomart Toqaev pen Nýman Kýrtýlmýsh eki eldiń halyqaralyq uıymdar aıasyndaǵy yqpaldastyǵyn kúsheıtý jáne Túrki memleketteri uıymyna múshe baýyrlas elderdiń ózara yntymaǵyn nyǵaıtý jóninde pikir almasty. Sondaı-aq Túrkıa eliniń basshylyǵymen aldaǵy kezeńge josparlanǵan joǵary deńgeıdegi kezdesýler pysyqtaldy.

Kezdesý sońynda memleket basshysy túrik sportshylary men delegasıasy bıyl qyrkúıek aıynda Astanada ótetin V Dúnıejúzilik kóshpendiler oıyndaryna belsendi qatysatynyna senim bildirdi.