Ótken táýlik ishinde qazaqstandyq shekarashylar memlekettik shekarany zańsyz kesip ótpek bolǵan 9 azamatty ustady, dep habarlaıdy «Qamshy» portaly QR UQK Shekara qyzmeti baspasóz qyzmetine silteme jasap.

Atap aıtqanda, elimizdiń ońtústiginde ornalasqan Saryaǵash shekara otrádyna qarasty «Darhan» shekara zastavasynyń (qazaq-ózbek shekarasy) narády shekara qorshaýyn buzyp, Ózbekstan jaqqa ótýge árekettenip jatqan 1 azamatty baıqaıdy. Onyń izine túsip ustaǵan kezde, taǵy da 7 sybaılasy tym-tyraqaı qasha jóneldi. «Zetta» degen ıttiń kómeginiń arqasynda álgilerdiń 4-eýi qolǵa tústi. Al úsheýin ózbek shekarashylary ustady.

Eki el shekarashylarynyń osylaı birlese qımyldaǵan is-sharasy sátti aıaqtaldy. Ustalǵandardyń barlyǵy Ózbekstan azamattary bolyp shyqty.

Atalǵan derek boıynsha materıaldar Saryaǵash aýdanynyń ishki ister bólimine berildi.

Memlekettik shekarany óziniń qalaýynsha kesip ótpek bolǵan taǵy bir oqıǵa Qostanaı shekara otrádyna qarasty «Qaıraq» shekara zastavasynyń (qazaq-reseı shekarasy) aýmaǵynda oryn aldy. 1984 jyly týǵan otandasymyz memlekettik shekara syzyǵynan 50 metr jerde shekarashylardyń qolyna tústi. Teksere kelegnde, «Vladımır» esimdi azamatqa reseıge barýǵa jol jabyq ekendigi belgili boldy. Sol sebepti, ol kisi osylaısha áreket etýge májbúr bolypty.

Oǵan QR Ákimshilik-quqyq buzýshylyq kodeksiniń 514 babynyń 1 tarmaqshasy boıynsha aıyppul (5 aılyq eseptik kórsetkish) kóleminde salyndy.