Reseı prezıdenti Vladımır Pýtın Reseıdegi AQSH azamattarynyń múlkin tárkileýge ruqsat beretin jarlyqqa qol qoıdy. Prezıdent óz áreketin AQSH-taǵy Reseı aktıvteriniń buǵattalǵanyna qarsy jaýap dep túsindirdi. Zań jobasyn TASS agenttigi áleýmettik paraqshasynda jarıalady. 

Qujatta Reseı úkimeti AQSH áreketin  «halyqaralyq quqyqqa qaıshy» dep baǵalaıdy. Jarlyqqa sáıkes, AQSH-ta múlikteri tárkilengen reseılik kompanıalar sheshimdi negizsiz dep tanyp, Reseı sotyna shaǵym túsirýge  quqyly. Eger Reseı soty AQSH memlekettik mekemeleriniń sheshimin negizsiz dep tanysa,  Reseıdegi AQSH azamattarynyń múlkin tárkileý arqyly shyǵynnyń ornyn toltyrady.

Zań jobasyn iske asyrý úshin arnaıy komısıa qurylyp, AQSH-tyń zańdy tulǵalaryna tıesili múlikti, sonyń ishinde shyǵynnyń ornyn toltyrýǵa bolatyn qundy qaǵazdardy anyqtaıdy.