Joǵary aýdıtorlyq palata Almaty oblysynda memlekettik resýrstardyń paıdalanylý tıimdiligine júrgizilgen tekseris jumystaryn aıaqtady. Tekseris nátıjeleri Álıhan Smaıylovtyń tóraǵalyǵymen ótken Palata otyrysynda qaraldy. Bul týraly Joǵarǵy aýdıtorlyq palata málim etti. 

Memleket basshysynyń bastamasymen Almaty oblysy 2022 jyly Jetisý oblysynyń qurylýymen ekige bólindi, al onyń jańa ortalyǵy Qonaev qalasyna aýysqan bolatyn. Óńir ekonomıkasynyń negizgi draıverleri – ónerkásip pen AÓK. Almaty oblysynyń ónerkásibi 90% óńdeýshi sektor kásiporyndarynan turady. Bul – respýblıkadaǵy eń joǵary kórsetkishterdiń biri bolyp tabylady.

2023 jyly óńirde 30-dan astam jańa óndiris iske qosyldy, bul myńnan astam jumys ornyn qurýǵa múmkindik bergen. İri ınfraqurylymdyq joba – uzyndyǵy 66 km quraıtyn Úlken Almaty aınalma avtojoly (ÚAAAJ) iske qosylyp, qala tirshiligine oń serpin bere bastady.

Qonaev pen Almaty arasyndaǵy G4 City jobasy da qaıta jandandy. Qazir oblysta týrızm salasy da qarqyndy túrde damyp keledi. Týrıser úshin qolaıly jaǵdaı jasaý maqsatynda Kólsaı, Qaıyńdy kólderin jáne Qapshaǵaı sý qoımasyn abattandyrý jalǵasqan. Munyń bári ekonomıkalyq damýdyń jandanǵanyn kórsetedi.

Sonymen qatar, aýdıtorlyq is-sharalardyń qorytyndysy boıynsha jergilikti atqarýshy organdardyń respýblıkalyq búdjetten transfertterge tym táýeldi ekeni anyqtalǵan. Ásirese jeke ınvestısıalardyń resýrstary tolyq qoldanylmaıtyny belgili bolǵan.

"Merdigerlik uıymdardyń búdjettik ınvestısıalyq jobalardy iske asyrý merzimderin keshiktirýi saldarynan bolatyn júıelik problemalar jergilikti búdjetke qosymsha júkteme salýda. Máselen, 2022 jyly quny 129 mlrd teńgeden asatyn 110 joba jáne 2023 jyly 110 mlrd teńgeden asatyn 81 joba normatıvtik merzimde aıaqtalmaǵan. 2021 jyly bastalǵan 5 avtojoldyń qurylys-montajdaý jumystary qarjylandyrylmaýyna baılanysty toqtap tur"-delingen resmı málimdemede.

G4 City jobasy aıasynda 10 jyldan astam ýaqyt buryn iske asyrý bastalǵan qazirgi Alataý qalasynyń obektilerimen baılanysty buzýshylyqtar bar ekeni belgili boldy. Atap aıtqanda, býhgalterlik eseptegi buzýshylyqtar anyqtalyp otyr.

"Qonaev ÁKK AQ "aınalym sqemasy" arqyly baǵany turaqtandyrý tetigin iske asyrýǵa alynǵan 4 mlrd teńge kredıttik búdjet qarajatynyń tek 1,5 mlrd teńgesi (38%) jumsalǵan. Qalǵan 2,5 mlrd teńge (62%) júıeli túrde depozıtterge salýmen bank shottarynda saqtalýda"-dep habarlady palata.

Aýdıtorlyq is-sharalardyń nátıjesinde Almaty oblysynda jalpy somasy 16,7 mlrd teńgege qarjylyq buzýshylyqtar anyqtaldy, onyń 12,2 mlrd teńgesi býhgalterlik esepti júrgizýge qatysty. Búgingi tańda aýdıt qorytyndysy boıynsha anyqtalǵan buzýshylyqtardyń 96%-dan astamy joıylǵan. Sondaı-aq 485 rásimdik buzýshylyq jáne 20 júıelik kemshilik anyqtalǵan.

Qazirgi ýaqytta Joǵary aýdıtorlyq palata barlyq anyqtalǵan buzýshylyqtardy joıý úshin ortalyq memlekettik organdar men ákimdikterge tıisti qorytyndylar men usynymdar bergen.