Bılik basyndaǵylar jastardyń turmysyn jaqsartýǵa barlyq jaǵdaı jasalǵan dep esepteıdi. Qazaqstan azamaty baspana alarda memlekettik búdjettiń múmkindikterin eskerýi kerek degen pikirde. Bul týraly Stan.kz aqparat agenttigi habarlady. 

Májilis depýtaty Dáýlet Muqaev premer-mınıstrdiń orynbasary Qanat Bozymbaevqa Qazaqstandaǵy jastardy turǵyn úımen qamtamasyz etýdiń jańa baǵdarlamasyn ázirleýdi usyndy. Dáýlet Muqaev óziniń depýtattyq  saýalynda Qazaqstan megapolısteriniń turǵyndary baspanasyz júrgenin aıtty. 2019 jyldan beri Astana, Almaty jáne Shymkent qalalarynda ýaqytsha jaldamaly páterlerde turatyn jastardyń sany 10 myńǵa jetken.

“Páter jaldap turatyn jastardyń aqsha jınap, baspana alýǵa múmkindigi joq. 2019 jyldan bastap ınflásıa deńgeıi kóterilip, turǵyn úı baǵasy jyldan jylǵa ósip jatyr. Osydan bes jyl buryn elimizde páterdiń sharshy metriniń quny 200 myń teńge bolsa, qazir 400 myńǵa jýyqtady. Onyń quny eki ese artty. Shynynda adamdar baspanaǵa aqsha jınaýdan buryn, qymbatshylyqtyń kesirinen kún kóris úshin jantalasyp júr”, – deıdi depýtat.

“Baspanaǵa suranys jyl saıyn ósip kele jatqanyn eskere otyryp (búginde kezekte shamamen 650 myń adam tur) munda muqtaj ári áleýmettik osal toptaryna basymdyq beriledi. Búginde jumys isteıtin jastardyń turmystyq jaǵdaıyn jaqsartýǵa arnalǵan túrli baǵdarlamalar bar", – deıdi premer-mınıstrdiń orynbasary.

2019 jyldan bastap Astana, Almaty jáne Shymkent qalalarynda da jumys isteıtin jastarǵa satyp alý quqyǵynsyz páterler jalǵa berilip keledi. Iaǵnı, jastarǵa jaldaý aqysyn tólemeı, belgili merzimde úı satyp alý úshin aqsha jınaýǵa múmkindik bar.

Qanat Bozymbaev bul baǵdarlama 2019 jyldan bastap iske qosylǵanyn jáne onyń aldaǵy ýaqytta da jalǵasatynyn aıtty. Alaıda onyń sózinshe úkimet jastarǵa jalǵa beriletin páterlerdi satyp alý quqyǵyn berý máselesin qarastyrmaıdy. 

“Jalǵa alýshylardyń jıi aýysýy jáne jańa jalǵa beriletin páterler salý esebinen bul tetik turǵyn úıge muqtaj azamattardyń kóbin barynsha qamtýǵa múmkindik beretinin atap ótken jón. Tetikti odan ári iske asyrý úshin 2023-2025 jyldarǵa atalǵan qalalarda qosymsha 9 myń jalǵa beriletin páter (jyl saıyn 3 myń páter) satyp alý úshin jergilikti búdjetterden 96,9 mlrd teńge mólsherinde qarajat bólý josparlanyp otyr", – dedi Qanat Bozymbaev.