QR Premer-Mınıstri Oljas Bektenov Pavlodar, Ekibastuz jáne Aqsý qalalarynda jylý jelilerin salýǵa jáne rekonstrýksıalaýǵa Úkimet rezervinen 9 mlrd teńge bólý týraly qaýlyǵa qol qoıdy.

Osylaısha, Pavlodarda (3,6 mlrd teńge) uzyndyǵy 2,5 shaqyrym bolatyn TM-13 jylý magıstrali salynady. Bul 41,5 myń adam turatyn Pavlov – Shevchenko – Kataev kósheleri ornalasqan aýdandaǵy kóppáterli turǵyn úılerdi turaqty jylýmen qamtamasyz etýge múmkindik beredi.

Ekibastuzda jalpy uzyndyǵy shamamen 4 shaqyrym (3,6 mlrd teńge) bolatyn TM-1 jáne TM-3 jylý magıstraldarynyń ýchaskeleri rekonstrýksıalanady. Osy jumystyń arqasynda jańa turǵyn úılerdi, áleýmettik mekemelerdi, shaǵyn jáne orta bıznes nysandaryn qosý kózdelgen. Bul 2 myńnan astam adamdy qamtıdy. 

Qalǵan 1,8 mlrd teńge Aqsýdaǵy №3,5 jáne 8 yqsham aýdandarda ornalasqan, uzyndyǵy 4,3 shaqyrym bolatyn oramishilik jylý jelilerin qaıta jańartýǵa aýdarylady. Sońǵy 2 jylda atalǵan ýchaskelerde 40-tan astam aqaý tirkelgen. Rekonstrýksıa jumysy 1,5 myńnan astam jergilikti turǵyndy sapaly jylýmen qamtamasyz etýge múmkindik beredi.

Pavlodar oblysy ákimdiginiń derekterine sáıkes, búgingi tańda Pavlodarda jylýmen jabdyqtaý jelileriniń uzyndyǵy 828,1 km (ortasha tozý – 82,8%), Ekibastuzda – 422,5 km (90,7%), Aqsýda – 99,1 km (59%) quraıdy. Tehnıkalyq tekserý nátıjeleri boıynsha shuǵyl jumystar júrgizilýi tıis, tozý deńgeıi asa joǵary 4 ýchaske anyqtaldy.