Tólebı aýdanynda karer jumysshysy tirideı órtenip ketken. Marqumnyń týystary tergeý jumysynyń baıaý júrip jatqanyn aıtady. Olar jumys berýshilerdiń nemquraılyǵyna da narazylyq tanytty. 

Otyrar.kz-tiń jazýynsha, Qarlyǵash Serbaeva osydan 13 kún buryn ulyn jer qoınyna tapsyrdy. 44 jastaǵy Qýanysh Serbaev eki jyldan beri Tólebı aýdany Aqbastaý aýylyndaǵy karerde jumys istegen. Alaıda 11 maýsym kúni júk kóligine tas tıep kele jatqan júrgizýshi jolda aýdarylyp, kólikpen birge órtenip ketken.

«Aldymda júrgen balam dem arasynda joq bolyp ketti, bir sekýndtyń ishinde. Ol qalaı bolǵany? Tehnıkalyq qaýipsizdik degen joq. Azannan keshke deıin sol mashınany qaıta-qaıta jóndeı beredi. Túnimen-kúnimen aýysymdy jumysta. Bir kedergi boldy ǵoı. Áıtpese bul balam mashınany beske biledi. Qansha jyldan beri aıdap kele jatqan. Sondyqtan olarǵa bastaryn ala qashýdyń qajeti joq», – deıdi marqumnyń anasy Qarlyǵash Serbaeva.

Jumysqa saý ketip, kúlge aınalǵan súıegi kelgen Qýanyshtyń artynda eki qyzy men áıeli qaldy. Birneshe jyl buryn aýyr dertke shaldyqqan jubaıy qazir Almatyda em alyp jatyr. Marqumnyń ákesi jumys barysynda jan tapsyrǵan ulynyń otbasyna eń quryǵanda ótemaqy berilýin suraıdy.

Úılengeli jaldamaly páterde turyp kelgen marqumnyń otbasy tek sońǵy jyldary aýyl mańynan úı salýdy bastaǵan. Biraq, ony da aıaqtap úlgermedi. Al, jumys berýshiler óndiriste júrip ajal qushqan Qýanyshtyń otbasyna járdem berilýi tek saraptamadan keıin belgili bolady dep otyr.

«Qýanysh aǵa «Kýarı servıs» kelgeli isteıdi. Óz isine tıanaqty kisi bolǵan. Jumysqa jaýapkershiligi bar. Óte uqypty kisi bolǵan. Buny endi saraptama anyqtar. Bilmeımin qalaı bolǵanyn. Jaýap bere almaımyn sózdiń ashyǵy», – deıdi Taý-ken sehynyń basshysy Maqsat Aıtqul.

Qazir bul iske qatysty eńbek qaǵıdalaryn buzý babymen tergeý bastaldy.