Polısıa qyzmetkeriniń zańdy talaptaryn oryndamaǵan nemese kedergi keltirgen júrgizýshi jaýapqa tartylady, dep habarlaıdy ishki ister mınıstrligi.
Mınıstrlik júrgizýshilerge úndeý jasady. Buǵan sońǵy kezderi BAQ pen áleýmettik jelilerde polısıa qyzmetkerlerinen jedel-profılaktıkalyq is-sharalardyń ótkizilýi týraly qujattardy talap etip, olardyń jumysyna kedergi keltirgeni týraly beınejazbalar sebep bolǵan.
"Kólikti toqtatý kezinde polısıa qyzmetkeri ózin tanystyryp, qyzmettik kýáligin kórsetip, toqtatý sebebin túsindirýi qajet. Júrgizýshi óz kezeginde ishki ister organdary qyzmetkeriniń zańdy talaptaryn oryndaýǵa mindetti. Al polısıa qyzmetkeri jedel-profılaktıkalyq is-sharanyń ótkizilip jatqanyn rastaıtyn qujattardy kórsetýge mindetti emes", - deıdi vedomstvo.
Mınıstrlik "Jol júrisi týraly" zańda kólikterdi toqtatý kezinde polısıa qyzmetkerleri men júrgizýshilerdiń is-qımylynyń naqty tártibi aıqyndalǵanyn aıtady.
"Polısıa qyzmetkeriniń zańdy talaptaryn oryndamaý, qyzmettik mindetterin atqarý kezinde onyń jumysyna kedergi keltirý 30 aılyq eseptik kórsetkish mólsherinde aıyppul salý nemese 15 táýlikke deıin qamaýǵa alý túrindegi ákimshilik jaýapqa ákep soǵady", – dedi QR İİM ákimshilik polısıa komıtetiniń tóraǵasy Qaısar Sultanbaev.
Pikir qaldyrý