Almaty qalasynyń ákimdigi beıbit jıyndar ótkizýge arnalǵan oryndardy ózgertýdi kózdep otyr. Tıisti ózgeris jobasy Ashyq NQA portalynda jarıalanǵan.

Beıbit mıtıń ótkizýge arnalǵan tórt orynnyń ekeýiniń syıymdylyǵy artyp, sherý ótkizetin oryn taryla túspek. Endi mıtıń ótkizýshiler Shevchenko kóshesindegi Shoqan Ýálıhanov atyndaǵy gúlzardyń ornyna Mámetova-Abylaı han kósheleriniń qıylysyndaǵy Amangeldi Imanov atyndaǵy saıabaqqa jınala alady. Shoqan Ýálıhanov atyndaǵy gúlzarda jınalýǵa ruhsat etilgen adam sany 1000-nan 500-ge kemıdi.

Sonymen qatar Shoqan Ýálıhanov gúlzarynan Mahatma Gandı atyndaǵy saıabaqqa deıingi beıbit sherý uıymdastyrýǵa arnalǵan jer Gagarın dańǵylynan bastap Jabaev kóshesiniń boıymen Muqanov kóshesine deıingi jerge aýystyrylady.

Mahatma Gandı atyndaǵy saıabaq pen "Sary Arqa" kınoteatrynyń artyndaǵy gúlzar mıtıń ótkizýge arnalǵan oryn retinde qala beredi, tek "Sary Arqaǵa" burynǵydaı 500 emes, 1000 adam jınalýǵa ruhsat etilmek.

Bul ózgeristerdi qalalyq qoǵamdyq damý basqarmasy jıyndardyń keıbir aýmaqtar men nysandardyń jumysyna áser etetindigimen baılanystyrady.