2024 jyly 104 myńnan astam talapker bilim granty konkýrsyna ótinish berdi. Bul týraly Ǵylym jáne joǵary bilim mınıstrligi habarlady.

Bıylǵy oqý jylynda bakalavrıatqa túsý úshin 79 myńǵa jýyq grant bólinip otyr. Granttardyń basym bóligi ınjenerlik jáne tehnıkalyq baǵyttarǵa bólingen. Bıyl alǵash ret ishinara oqý aqysy bar saralanǵan granttar engizildi. Al "Pedagogıkalyq ǵylymdar" jáne "Áleýmettik ǵylymdar, jýrnalısıka jáne aqparat" baǵyttary boıynsha 150 saralanǵan granttan bólingen.

"Eń kóp tańdalǵan qala – Almaty, 42 myń bala ońtústik astanamyzdy stýdenttik shaq ótkizý úshin tańdaǵan. Elordanyń oqý oryndarynda oqý úshin 22 myń ótinish qabyldansa, 6,5 myń adam Shymkent ýnıversıtetterinde oqýǵa nıet bildirgen"- dep habarlady mınıstrlik.

Birneshe jyl qatarynan talapkerler "Pedagogıkalyq ǵylymdar", "Injenerlik, óńdeý jáne qurylys salalary" jáne "Aqparattyq-kommýnıkasıalyq tehnologıalar" sıaqty baǵyttarǵa basymdyq berip keledi.

Sonymen qatar,  "Serpin" baǵdarlamasy arqyly 3 903 grant bólingen.