Parıj olımpıadasyna qatyspaı qalǵan Elena Rybakına qazaqstandyq jankúıerlerden keshirim surap, málimdeme jasady. Tenısshi vıdeoda shynymen aýyryp qalǵanyn aıtyp, el úmitin aqtaı almaǵanyna ókinish bildirdi.

"Parıj Olımpıadasyna Qazaqstan quramasynyń atynan qatysa almaǵanym ókinishti. Komandamen birge daıyndalyp, kóp eńbek ettim. Olımpıadan júldemen oralǵym keldi. Biraq dál oıynnyń aldynda aýyryp, qyzýym kóterildi, tynys alýym qıyndady. Sondyqtan dárigerler kortqa shyǵýǵa tyıym saldy. Sizderdiń maǵan úlken senim artqandaryńyzdy bilemin. Barlyq qazaqstandyq jankúıerlerden keshirim suraımyn", - dedi Rybakına.

Aıta keteıik, tenısshi bronhıtpen aýyryp, jarysqa bir kún qalǵanda Parıj Olımpıadasyna qatyspaıtyny belgili bolǵan. Sportshynyń bul áreketi qoǵamda qyzý talqylanyp, synǵa ushyraǵan edi.