Atyraýda 232 mln teńge jymqyrǵany úshin №4 Atyraý qalalyq emhanasynyń bir top qyzmetkeri bas bostandyǵynan aıyryldy. Bul týraly Qazaqstan Respýblıkasynyń sybaılas jemqorlyqqa qarsy agenttiginiń baspasóz qyzmeti habarlady. 

"26 tamyzda Atyraý qalasynyń soty №4 Atyraý qalalyq emhanasynyń dırektory E. Sabırovqa, sharýashylyq meńgerýshisi A. Áljanovaǵa, bas býhgalter M. Dúısenǵalıevaǵa jáne kásipker A. Eralıevaǵa qatysty úkim shyǵardy"- delingen habarlamada.

Sottalýshylar zańnama talaptaryn buza otyryp jasalǵan sharttar sheńberinde is júzinde qyzmet kórsetýsiz kásipkerge 231,8 mln teńge somasynda aqsha aýdarý jolymen qarajat jymqyrǵany úshin kináli dep tanyldy. Sot úkimimen olarǵa 5 jyldan 7 jylǵa deıingi merzimge bas bostandyǵynan aıyrý jazasy taǵaıyndaldy.

Sonymen qatar, emhana basshysy Sabırov ómir boıy memlekettik qyzmette jáne kvazımemlekettik sektor sýbektilerinde qyzmet atqara almaıdy. Áljanova, Dúısenǵalıeva jáne Eralıeva memlekettik uıymdarda 7 jyl materıaldyq-jaýapty laýazymdardy atqarý quqyǵynan aıyryldy.