Úkimet otyrysynda premer-mınıstrdiń orynbasary Qanat Bozymbaev komýnaldyq qyzmetterdi tutyný normalary tutynýshylar úshin jyl sońyna deıin ázirlenetinin jetkizdi. 

Energetıka mınıstrliginiń málimetinshe, jylytý maýsymyna daıyndyq aldyn ala bastalǵan. Alaıda búgingi tańda JEO-nyń ortasha tozý deńgeıi el boıynsha 65%-dy quraıdy. Bul ótken jylmen salystyrǵanda 2% jaqsarǵan. 

“El boıynsha úlken másele týdyryp turǵan JEO joq. Temirtaý, Jezqazǵan, Kentaý, Rıdder jáne Ekibastuz JEO-ǵa Energetıka mınıstrligi, ákimdikter tarapynan jylý berý maýsymyna daıyndaýǵa asa nazar aýdarylǵan”, – dedi QR Energetıka mınıstrligi Atom jáne energetıkalyq qadaǵalaý jáne baqylaý komıteti tóraǵasynyń orynbasary Ilá Rojkov.

2022 jyly Ekibastuz JEO-na bolǵan iri apattan keıin Memleket basshysy problemalyq energıa aktıvterin memleket menshigine qaıtarý máselesin qaraýdy tapsyrǵan bolatyn. Qazir Ekibastuz, Rıdder, Aqtaý jáne Mańǵystaý oblystaryndaǵy JEO komýnaldyq menshikte. Ázirge Ekibastuz JEO-ny jóndeýge úkimet rezervinen 30 mıllıard teńgeden astam qarajat bólingen.

“Úkimet rezervi esebinen 15 qazandyqqa, sondaı-aq "Samuryqenergo" qarajaty esebinen 12 qazandyqqa jóndeý jumystary júrgizilýde. Jumys kestege sáıkes, artta qalmaı úlgerýdemiz”, – dedi Ekibastuz qalasy ákiminiń orynbasary Erjan Salhanov.

Al sınoptıkter qysta, ásirese eldiń soltústik jáne shyǵys aımaqtarynda turaqsyz jáne jeldi aýa-raıyn boljaýda.