Qyzylorda qalasynyń №2 soty azamattyq nekedegi áıelin uryp-soǵyp ózine qol jumsaýǵa deıin jetkize jazdaǵan polısıa maıoryn sottady.
Tergeý materıaldaryna saı, jábirlenýshi azamattyq nekedegi kúıeýiniń uıaly telefonyna tirkelgen abonenttik nomerdi óziniń telefonyna salyp, belgisiz áıelmen sóıleskenin oqyp, aralarynda janjal týǵan.
"Janjal kezinde sottalýshy jábirlenýshini balaǵattap, julqylap, birneshe ret aıaýsyz, asa qatygezdikpen uryp-soǵyp, edenge qulatyp, basynan shyny bótelkemen uryp, onyń uıaly telefonyn alyp qoıǵan. Jábirlenýshi ómirine qaýip tónip turǵanyn jáne ári qaraı ómir súrý múmkindiginen aıyrylyp qalýyn sezinip, azamattyq nekedegi kúıeýiniń uryp-soǵý áreketterinen qutylý maqsatynda qonaq bólmedegi lodjıadan óz erkimen sekirgen. Nátıjesinde, jábirlenýshi A.-nyń densaýlyǵyna "aýyr" dárejeli zıan kelip, İ top múgedektigi taǵaıyndalǵan" delingen sot habarlamasynda.
Sot talqylaýynda sottalýshy ózine taǵylǵan aıypty moıyndamaǵan. Alaıda sot-medısınalyq saraptamasynyń qorytyndysy basqany kórsetken.
Sot sheshimimen er adam qylmystyq kodekstiń 105-baby 1-bóligi (Jábirlenýshini qorqytý, oǵan qatygezdikpen qaraý arqyly ózin-ózi óltirýge barýǵa deıin jetkizý) boıynsha kináli dep tanylyp, 1 jyl 6 aı merzimge bas bostandyǵynan aıyrylyp, materıaldyq shyǵyn retinde 4 054 181 teńge, moraldyq zıan retinde 5 000 000 teńge tóleýge mindetteldi. Sondaı-aq sottalýshy "maıor" sheninen aıyryldy.
Pikir qaldyrý