Búgin Astanada «Taza Qazaqstan» naýqany men Taza Astana jańa áleýmettik jobasynyń aıasynda senbilik ótip, «Han-SHatyr» saýda oıyn-saýyq ortalyǵynyń mańyna elimizdiń tanymal sportshylarynyń qatysýymen aǵash otyrǵyzyldy. İs-sharanyń ótýine Astana qalasynyń Dene shynyqtyrý jáne sport basqarmasy men Nura aýdanynyń ákimdigi uıytqy bolǵan.
Osynaý is-sharaǵa short-trekten Qysqy Olımpıadanyń qatysýshysy, el tarıhyndaǵy álem Kýboginiń birinshi jeńimpazy Abzal Ájiǵalıev, short-trekten qysqy Ýnıversıadanyń kúmis júldegeri Malıka Ermek, qazaqstandyq fýtbolshy, Qazaqstan Medıa fýtbol federasıasynyń tuńǵysh prezıdenti Dıdar Sydybek, V Dúnıejúzilik kóshpendiler oıyndarynyń chempıondary men elshileri belsene qatysty.
– Ózim Oral qalasynyń týmasymyn. Týǵan jerim jap-jasyl ári aǵashtarǵa baı. Ol jaqta turaqty túrde senbilikke qatysyp, ekologıanyń taza bolýyna úles qosatyn edim. Al 2018 jyly Astana qalasyna kóship keldim. Elimizdiń astanasy da aǵashtarǵa baı, ásemdigimen erekshelense deımin. Sondyqtan búgingi senbilik pen «Taza Qazaqstan» aksıasynyń bir múshesi bolǵanyma óte qýanyshtymyn, – dedi Abzal Ájiǵalıev.
Ekologıalyq aksıa barysynda bes aýdanda 2 myńnan astam jasyl jelek, al Han-SHatyrdyń mańynda emen, qaıyń, qaraǵaı syndy 100-den astam kóshet otyrǵyzyldy.
– 5-shi Dúnıejúzilik kóshpendiler oıyndarynda qusbegilikten el tarıhynda tuńǵysh altyndy ıelendim. 2018 jyly Qyrǵyzstan elindegi dodada qola júldeger atanǵan bolatynmyn. Alaıda Astana qalasynda shara uıymdastyrý deńgeıiniń joǵarlylyǵymen erekshelene bildi. Jalpy qalalyq senbilikke qatysý bala kezden qalyptasqan. Osyndaı sharalar arqyly boıǵa jaqsy ádetter qalyptasyp, ózgelerge úlgi bolamyz, – dedi 5-shi Dúnıejúzilik kóshpendiler oıyndarynda Astana qalasynyń elshisi ári chempıony Ertýǵan Serikbek oıymen bólisip.
Esterińizge sala keteıik, elordada Taza Astana jańa áleýmettik jobasy ótip jatyr. Joba quqyqtyq tártip, abattandyrý, kógaldandyrý, sanıtarlyq tazalaý, kóppáterli turǵyn úılerdiń, úı janyndaǵy, oramishilik jáne aýla aýmaqtarynyń kirme joldarynyń tazalyǵy máseleleri boıynsha júıeli jumys júrgizýge baǵyttalǵan.
Derekkóz: elordainfo.kz
Pikir qaldyrý