"Qurmetti Qasym-Jomart Kemeluly, sizge, Qazaqstan azamattarynyń konstıtýsıalyq quqyqtarynyń kepili retinde, Almaty turǵyny Aleksandr Pekelnıktiń jubaıy Anastasıa júginip otyr. Bul ótinishti osyndaı formatta jasaýǵa májbúrmin, sebebi máseleniń mańyzdylyǵy basqa jol qaldyrmaıdy. Sizden osy jaǵdaıǵa nazar aýdaryp, ádildiktiń ornaýyna yqpal etýińizdi suraımyn. Belgili bolǵandaı, ótken jyldyń kúzinde Almatydaǵy hostelde bolǵan órttiń saldarynan 13 adam qaza tapty. Bul – qaıǵyly oqıǵa. Biz sol adamdardyń otbasylaryna shyn júrekten kóńil aıtamyz. Alaıda bul tragedıa meniń otbasymdy da aınalyp ótpedi. Biraq múldem basqa qyrynan. Búginde meniń kúıeýimdi kináli etip kórsetýge tyrysyp jatyr. Oqıǵa bolardan bir jyl buryn kúıeýimniń kompanıasy A.Sh.86 mekenjaıyndaǵy bos turǵan ǵımaratta órt dabylyn qalpyna keltirýmen aınalysqan, keıin sol jerde zańsyz hostel ashyldy", – dep Pekelnık prezıdent Toqaevqa júgindi.

Ol tergeýdiń basynan-aq kúıeýiniń iske kýáger retinde qatysqanyn túsindirdi.

"Ol órt shyqqanǵa deıin bul hosteldiń bar ekenin bilmegenimen, tergeýge barynsha kómek kórsetti. Alaıda, maýsymnyń sońynda eshqandaı zańdy dálelder men negizdersiz kúıeýimniń kýáger retindegi mártebesi kúdiktige aýystyryldy. Ony órt qaýipsizdigi talaptaryn buzdy dep aıyptap otyr, alaıda zań boıynsha bul úshin tikeleı jaýapty – hosteldiń ıesi, ıaǵnı dırektory. Kúıeýim onyń ózimen de, hostelmen de baılanysqa shyqpaǵan, eshqandaı qyzmet kórsetpegen, tipti tanys ta bolmaǵan. Tergeý bul dabyl júıesiniń hostelge sáıkes kelmeýin alǵa tartyp otyr. Zań boıynsha, ǵımaratta qaıta josparlaý júrgizilgennen keıin, burynǵy órt dabyly júıesi jaramsyz bolyp, ony qoldanýǵa tyıym salynady, óıtkeni órt dabyly ǵımarattyń fýnksıonaldyq maqsatyna sáıkes ornatylady. Al kúıeýimniń kompanıasy jumys istegen kezde bul mekenjaıdaǵy ǵımarat bos turǵan, eshqandaı fýnksıonal bolmaǵan", – dedi áıel.

Áıeldiń aıtýynsha, tergeý onyń kúıeýiniń bul iske qatysy joqtyǵyn kórsetetin barlyq dálelderge kóz juma qaraıdy.

"Bizdiń barlyq ótinishterimiz ben shaǵymdarymyzǵa teris jaýap aldyq. İs sotqa jiberildi. Qurmetti Qasym-Jomart Kemeluly, bizdiń qıyn jaǵdaıymyzǵa beıjaı qaramaýyńyzdy suraımyn. Meniń kúıeýim – zańǵa baǵynatyn azamat, ol adal túrde óz isin júrgizedi. Ol – parasatty adam, tamasha áke jáne otbasy adamy", – dedi áıel.

Onyń aıtýynsha, tergeý kúıeýiniń bul iske qatysy joqtyǵy týraly barlyq dálelderge kóz juma qaraǵan.

"Halyqqa arnalǵan joldaýyńyzda bizdiń qoǵamda zań men tártip ornatýǵa tıis ekenin aıttyńyz. Bul – qoǵamdyq jáne jeke qaýipsizdikti qamtamasyz etýdiń negizgi sharttary. Bizge ádilettilikke qol jetkizýge kómektesińiz, adamdardyń qaza tabýyna shyn máninde kináliler jaýapqa tartylsyn. Biz adal jáne ádil Qazaqstanda ómir súrgimiz keledi", – dep qorytyndylady Pekelnık.