Astanadaǵy Ulttyq akademıalyq kitaphanada Memle­kettik hatshy Gúlshara Ábdiqalyqovanyń qatysýymen Qazaqstan halqy assambleıasynyń keńeıtilgen májilisi bolyp ótti.
Alqaly jıynǵa Qazaqstan Respýblıkasy Prezıdenti Ákimshiligi basshysynyń orynbasary Baǵlan Maılybaev, QHA Tóraǵasynyń orynbasary – hatshylyq meńgerýshisi Eraly Toǵjanov, Mádenıet jáne sport mınıstri A.Muhamedıuly depýttattar men memlekettik organdar jáne etnomádenı ortalyqtardyń, ǵylymı jáne shyǵarmashyl zıaly qaýym ókilderi qatysty.
Jınalǵandar aldynda sóz alǵan Memlekettik hatshy Gúlshara Áb­diqalyqova Elbasy Nursultan Nazarbaevtyń bes ınstıtýttyq re­for­masy men «100 naqty qadam» Ult josparyn júzege asyrý mem­lekettik jáne qoǵamdyq ınstıtýttardyń jumysyn tereńnen qaıta formattaý­dy kózdeıtinin atap kórsetti. Osyǵan baılanysty qoǵamdyq kelisim men jalpyulttyq birlikti qamtamasyz etetin negizgi ınstıtýt­tardyń biri retinde Qazaqstan halqy assambleıasynyń róli barynsha arta tús­pek. Keńeıtilgen májiliste QHA jyly qarsańynda belgilen­gen is-sharalardyń, atap aıtqanda, «Beıbitshilik pen kelisimniń jol kar­tasy» mega jobasyn, «QHA – 20 izgi is» respýblıkalyq aksıasynyń iske asyrylý barysy, Assambleıanyń ǵylymı-saraptamalyq keńesi qyz­metiniń qorytyndylary, sondaı-aq Qazaqstan halqy assambleıa­synyń 2025 jylǵa deıingi damý tujyrymdamasy qaraldy. QHA Keńesi oty­rysynyń qorytyndysy boıynsha Memlekettik hatshy Gúlshara Áb­diqalyqova Qazaqstan halqynyń yntymaǵy men birligin odan ári ny­ǵaıtýdy kózdeıtin birqatar naqty tapsyrmalar berdi. 
Qazaqstan halqy Assambleıasy tóraǵasynyń orynbasary E.Toǵ­janov «Elbasy Jarlyǵymen jarıalanǵan Qazaqstan halqy assambleıasy jyly elimizde, barlyq óńirlerde, alys aýyldarda, eldi mekenderde jáne shet elderde qoǵamdyq kelisim men el birliginiń qazaqstandyq úlgisi saltanat qurǵan, tarıhı jeńister jylyna aınaldy. Assambleıa jylynyń aıtýly jańalyǵynyń biri Elbasy­myz N.Á.Nazarbaevtyń «100 naqty qadam «Barshaǵa arnalǵan qazirgi zamanǵy memleket» – Ult josparynyń» jarıalanýy boldy. Ult josparynyń «Birtektilik pen birlik» baǵytynyń negizgi iske asyrýshy mehanızmi retinde Qazaqstan halqy assambleıasy belgilenip otyr» dep atap ótti.
– Shyndyǵynda da bıylǵy jyly Qazaqstan halqy Assambleıasy­-na – 20, Ata zańǵa – 20, Qazaq handyǵy – 550 jyl, Jeńiske – 70 jyl toldy. Bıylǵy jylǵy Prezıdenttik saılaýda halyq úlken tańdaý jasady, prezıdenttik saılaý Ult kóshbasshysy, memleket basshysynyń dara jeńisimen aıaqtaldy. Bizdiń el «Bes ınstıtýttyq reforma jáne «100 naqty qadam» Ult josparyn júzege asyrýǵa kiristi. Jaqynda ǵana patrıottar forýmy ótkizilip, jalpyulttyq patrıottyq «Máńgilik el» ıdeıasyn talqyladyq, – dedi óz sózinde Qazaqstan halqy assambleıasy tóraǵasynyń orynbasary E. Toǵjanov. 
Búgingi keńeske Búkilálemdik rýhanı kelisim kongresiniń teń­tór­aǵa­sy Reseı Memlekettik dýmasynyń depýtaty Iosıf Kobzon, Etıka ın­stıtýtynyń rektory, avstrıalyq Vılgelm Aýgýstata, Reseı hal­qy assambleıasynyń tóraǵasy Svetlana Smırnova, jáne taǵy basqa memleketterden ókilder qatysty. 
 Búgingi tańda Assambleıanyń basty maqsaty – bes reformany júzege asyrý jáne birtutas bolashaqtyń ultyn qalyptastyrý bolyp otyr. Sondyqtan ony júzege asyrý qazaqstandyqtyq birlikti odan ary nyǵaıtyp, jalpyulttyq patrıottyq ıdeıa «Máńgilik elmen» bite qaınasatynyna senim mol.
Asyly OSMAN, QHA múshesi: Elbasy Nursultan Nazarbaev BUU-nyń bıik minberinen sóılegende, adam balasy úshin eń aldymen birigý, ózara kelisim jáne ulttardyń uıysýy qajet ekendigin ashyq aıtty. Bul – beıbitshilik súıgish basshymyzdyń basty qaǵıdasy! Osydan týra jıyrma jyl buryn qurylǵan Qazaqstan halqy assam­bleıa­sy alǵashqy kúnnen bastap, dál osy maqsatta jumys istep keledi. Taıaýda elordamyz Astanada «Máńgilik El – Birtutas Bolashaq Ult» respýblıkalyq patrıottar forýmyn uıymdastyrýǵa da QHA mu­ryndyq bolǵany aqıqat. Óıtkeni bolashaq – jastardiki. Al jastardy týǵan Otanyn janyndaı jaqsy kóretin, patrıot ıaǵnı otanshyl etip tárbıeleý, bul – Qazaqstan halqy assambleıasy alǵa qoıǵan asyl mu­rattardyń biri. Sondyqtan bul forýmnyń da elimizde ómir súrip jat­qan san ult jastarynyń bereke-birligin jarastyryp, yntymaǵyn art­tyrýǵa qosatyn úlesi zor. 
Anatolıı BASHMAKOV, L.Gýmılev atyndaǵy Eýrazıa ulttyq ýnı­versıtetiniń kafedra meńgerýshisi, QHA múshesi: Qazir keń baıtaq Qazaqstannyń barlyq oblystarynda jekelegen ulttardyń mádenı ortalyqtary men birlestikteri qyzmet jasaıdy. Osynyń nátıjesinde elimizdiń árbir aımaǵynda turatyn ulttar men ulys ókilderi ózderiniń kesheden búginge jetken salt-dástúrleri men ádet-ǵuryptaryn saqtap, ony urpaqtan- ur­paqqa jetkizip keledi. Bul – ásirese, QHA qurylýynyń 20 jyldyq torqaly toıy qarsańynda jer-jerde jaqsy kórinis tabýda. Mundaı is-sharalardyń júzege asýyna Assambleıanyń aıryqsha nazar aýdaryp, qamqorshy bolyp otyrǵany aqıqat. Mine, sondyqtan «Qa­zaq­stan» dep atalatyn ortaq úıimizde ulttardyń birligi men yntymaǵy órkendeı túsýde. 
 

Derekkóz: Aıqyn-aqparat