Erlan Nildibaev:
Fırmalyq blanki oblys ákiminiń nusqaýymen ǵana beriledi
Qaraǵandy oblysyn Serik Ahmetov basqarǵan jyldary resmı mekemeniń fırmalyq blankileri bógde adamdarǵa berilgen. Bul týraly Serik Ahmetov pen oblystyń birqatar laýazymdy sheneýnikteriniń qylmystyq isi boıynsha «Kanalızasıalyq tazalaý júıesi» atty altynshy epızodty qaraý kezinde sotqa jaýap bergen kýágerler ashyq aıtty. 21 qazan kúni sotqa túsinik bergen «Metalýrgıa-Metall óńdeý» ındýstrıaldyq parki» (budan ári qysqartylǵan ataýy - MMIP) JSHS-niń burynǵy qyzmetkeri Demıd Smagın Qaraǵandy oblysynyń ákimi Serik Ahmetovtiń qoly qoıylǵan hat tehnologıalyq qondyrǵylardy aýystyrý máselesin qaıtadan qaraýǵa negiz bolǵanyn habarlady.
«Ahmetovtyń haty» boıynsha sotta eki kýáger sóz sóıledi. Oblystyq ákimdiktegi qujat aınalymyna baqylaý jasaıtyn ınspektor Mádına Táýirbaeva «MMIP» JSHS-niń dırektory Anatolıı Essege fırmalyq blankini óz qolymen bergenin aıtty. Ol kezde Mádına bólimniń bas mamany Janar Qozbaeva demalysta bolǵandyqtan, bólmede jalǵyz otyrǵanyn esine túsirdi. «Bul oqıǵa áli esimde. Janar demalysqa shyǵyp ketip, kabınette jalǵyz otyrǵan edim. Bir sátte Anatolıı Erıkuly, kirip keldi de fırmalyq blanki berýimdi ótindi. Ol kisini ákimdik ǵımaratynan jıi kórip júretinmin. 5 qabattaǵy depýtattyq bólmeniń janynda kabıneti de boldy. Oǵan qosa Esse myrza oblys ákimi ótkizetin jınalystardan bir qalmaıtyn. Ótinishin estigen soń, bólim jetekshisine telefon soǵaıyn dep jatqan edim, kenet kabınetke Erlan Mekejanuly Nildibaev ózi kirip keldi. Men oǵan Anatolıı Erıkulynyń fırmalyq blanki suraǵanyn aıtyp edim: «Jaraıdy. Berińiz» dedi. Oblys ákiminiń blankisin berip, ony arnaıy jýrnalǵa tirkedim. Sońynan Anatolıı Erıkuly qolyn qoıdy» dep áńgimeledi ol.
Biraq ákimdikte 22 jyl jumys istegen maman «MMIP» JSHS-niń dırektorynyń ákimdiktiń tańbasy bar qujatty alýǵa qandaı quqyǵy baryn túsindire almady. Hat boıynsha sotqa jaýap bergen ekinshi kýáger – Qaraǵandy oblysy ákimi apparatynyń bólim basshysy Erlan Nildibaev A. Esseniń oblys ákiminiń nusqaýynsyz eshqandaı blanki alýǵa múmkindigi joqtyǵyn málimdedi. Onyń aıtýynsha, oblys ákiminiń fırmalyq blankileri qatań esepke alynǵan qujattar bolyp sanalady. Onyń ár danasy berilgen kezde arnaıy jýrnalǵa tirkelip otyrady. Jáne ondaı blankini qandaı da bir hat daıyndaıtyn kezde ákim apparatynyń qyzmetkerleri, bólim basshylary ǵana alýǵa quqyly. Sebebi blankiler bógde adamdarǵa berilmeıdi.
Sotta prokýrordyń: «Oblystyq ákimdiktiń qurylymdyq bólimshesi bolyp tabylmaıtyn mekeme basshylarynyń mundaı fırmalyq blankini alýǵa quqyǵy bar ma?» degen saýalyna E. Nildibaev: «Fırmalyq blankiler tek basshylyqtyń tapsyrmasy boıynsha ǵana beriledi» dep jaýap berdi. Ol sotqa deıingi tergeýge bergen jaýabynda mynadaı túsinik bergen: «Oblys ákiminiń mınıstrlikter men ortalyq memlekettik organdarǵa jazǵan hattary mindetti túrde túpnusqasymen jáne quzyretti adamnyń qolymen jiberiledi. Ondaı hattar fırmalyq blankige jazylǵan jaǵdaıda ǵana tirkeledi. Berilgen blankilerdi tirkeıtin jýrnalda 2011 jyldyń 23 tamyzynda 000368 nómirli fırmalyq blankini Esseniń alǵany jazylǵan, ony óziniń qoıylǵan qoly rastaıdy. Men ony oblys ákimi S. N. Ahmetovtiń keńesshisi bolyp isteıdi eken dep oıladym. A. Esse oblys ákimi S. Ahmetovtiń nusqaýynsyz óz erkimen ondaı blankini ala almaıdy. Eger ákimniń ózi Qurylys isteri jónindegi agenttikke hat daıyndaýdy tapsyrmasa, eshkim ondaı hatty jazbaıtyn edi ǵoı».
Sot otyrysynda kýáger sol jolǵy jaýabyn taǵy rastady.
Derekkóz: Jas qazaq
