Baıbazarovtyń sózinshe, keıingi birneshe aptada valúta naryǵynda teńge baǵamynyń álsireýine áser etken belgili bir aýytqýlar boldy. Ol ótken aptada dollar baǵamy 500 teńgeden asqanyn eske saldy.

“Osyǵan baılanysty, bizdiń azamattar men bıznestiń alańdaýshylyǵyn túsine otyryp, úkimet pen Ulttyq bank valúta naryǵyndaǵy turaqtylyqty qamtamasyz etý boıynsha kelisilgen sharalar qabyldap jatyr. Ulttyq valútanyń aıyrbas baǵamyn túzetý irgeli syrtqy faktorlardyń áserinen ǵana týyndaıtyn qubylys ekenin atap ótken jón", – dedi Baıbazarov.

Vıse-premer teńge baǵamyna áser etetin negizgi úsh faktordy atady.

• Birinshi faktor – sońǵy aılarda dollar ındeksiniń jahandyq deńgeıde nyǵaıýy;
• Ekinshi faktor, munaıdyń álemdik baǵasynyń azdap tómendeýimen baılanysty;
• Sońǵy, mańyzdy faktor – reseı rýbliniń álsireýi.

"Reseı bizdiń negizgi saýda seriktesimiz ekenin eskersek, rúbl baǵamynyń aýytqýy teńge baǵamyna áser etýi múmkin. Osyndaı jaǵdaıda azamattarymyzdyń áleýmettik jaǵdaıy men ál-aýqatynyń nasharlaýyna jol bermeý jáne kásipkerlerge keri áser etýdi azaıtý úkimettiń basty mindeti sanalady. Ekonomıka men halyq úshin yqtımal teris saldardy turaqtandyrý jáne barynsha azaıtý úshin barlyq qajet sharalar qabyldanady”, – dedi premer-mınıstrdiń orynbasary.

Onyń aıtýynsha, Qazaqstan úkimetiniń "bul úshin resýrstary men quraldary jetkilikti".