Elimizdiń barlyq aıyrbastaý pýnktterindegi satyp alý jáne satý aıyrmashylyǵy 2 teńgeden aspaıdy. Eger bul ereje buzylsa, Ulttyq bank qatań sharalardy qoldanady. Bul týraly búgin Almatyda BAQ ókilderimen kezdesken QR Ulttyq bankiniń tóraǵasy Qaırat Kelimbetov habarlady. «Mundaı jaǵdaıdy keıbir saýdagerler paıdalanyp qalady. Valúta aıyrbastaý jónindegi aqparat teris pıǵylda paıdalanylýy múmkin, sondyqtan eń aldymen, Ulttyq banktiń sózine sený kerek ekenin eskertemiz. Osyǵan oraı barlyq aıyrbastaý pýnktterinde satyp alý jáne satý aıyrmashylyǵy 2 teńgeden asyrýǵa jol bermeý sheshimin qabyldadyq», - dep atap ótti Ulttyq banktiń basshysy. Ol bul sheshimdi búgin jáne aldaǵy ýaqytta elemegen aıyrbastaý pýnktterin Ulttyq bank qatań jazalaıtynyn, tipti, lısenzıasynan aıyryp, mundaı aıyrbastaý pýnktteriniń qyzmetin toqtatýǵa deıin baratynyn jetkizdi. «Teńgeniń tepe-teńdik baǵasy Qazaqstannyń ekonomıkasyna paıdaly ekenin qaıta túsindirgimiz keledi. Ulttyq bank tólem júıesiniń qurylýyn qamtamasyz etedi. Sondaı-aq, Ulttyq jáne ózge de bankter aıyrbastaý pýnktterin sheteldik valútamen qamtamasyz etedi», - dedi Qaırat Kelimbetov.