Bıyl Mańǵystaý oblysynda balyqpen aınalysatyn 3 kásiporyn 45,5 tonna bekire tuqymdas jáne jaıyn balyqtaryn ósirdi. Al, 2025 jyly óńirde 286 tonna balyq ósirý josparlanýda. Bul týraly OKQ ótken brıfıńte Mańǵystaý oblysynyń ákimi Nurdáýlet Qılybaı aıtyp berdi.

Bıyl Túpqaraǵan aýdanynda bekire balyǵy men ýyldyryq óndiretin ferma salý úshin 56 gektar jer ýchaskesi berildi. Ferma qurylysy 2025 jyldyń basynda bastalady dep kútilýde. Joba iske qosylǵannan keıin 30 turaqty jumys orny ashylady. Maselen Shveısarıanyń áıgili balyq fermasy  baseınde bekire tuqymdas balyq túrlerin ósirý jáne as ýyldyryǵyn óndirý jobasyn iske asyrady. Joba quny quny 4,2 mlrd teńge. Al, Qaraqıa aýdanynda shaıan tárizdiler men balyq ósirý jobasy iske asyrylady.

Jalpy 2025-2027 jyldary quny 12 mlrd.teńge bolatyn 8 ınvestısıalyq jobany iske asyrý kózdelip otyr. Onyń ishinde eń irisi – «Organic fish» seriktestiginiń tor qorshamada bekire tuqymdas balyq túrlerin ósirý jobasy. Jobanyń qýaty jylyna 5 myń tonna, ınvestısıalyq quny 7,4 mlrd teńge.

Atalǵan jobalar iske qosylǵan jaǵdaıda «Qazaqstanda jasalǵan» degen otandyq brend qalyptasyp, el naryǵyn jergilikti ónimmen qamtý josparlanyp otyr.
​Mańǵystaýda 30 jyl úzilisten keıin kásibı balyq aýlaý sharýashylyǵyn damytý qolǵa alyndy. Keńes dáýiri kezinde qarqyndy damyp, keıin toqtap qalǵan bul sharýashylyqty qaıta jańǵyrtý úshin birqatar ınvestorlar tartyldy. Búgingi kúni Kaspııden balyq aýlaıtyn zamanýı kemeler satyp alyndy. Keler jyly taǵy tórt keme alý josparlanyp otyr. Osylaısha 2025 jyly teńizden 20 myń tonnaǵa deıin balyq aýlaý kózdelýde.

Mańǵystaý oblysy ákiminiń baspasóz qyzmeti