ALMATY. QazAqparat- Búgin Almaty qalasynyń ákimdigi bıznestiń áleýmettik jaýapkershiligi aıasynda «ForteBank» aksıonerlik qoǵamymen Memorandýmǵa, al «Elektrokabel zaýyty» JSHS-men Kelisimge qol qoıdy.
Bul týraly Almaty ákiminiń baspasóz qyzmetinen habarlady.
Endi osy qujattar aıasynda emdeý-saýyqtyrý, bilim berý nysandaryn salý jónindegi jobalar júzege asyrylyp, kásipkerlik sektoryna barynsha qoldaý kórsetiletin bolady.
«ForteBank» AQ-men jasalǵan Memorandýmǵa sáıkes, Almatyda shaǵyn jáne orta bıznes sýbektilerin jeńildetilgen shaǵyn nesıelermen qamtamasyz etý jobasyn júzege asyrý, basqa da qarjylyq qyzmetterdi damytý, Áýezov aýdanynda balabaqsha salý, bos jatqan jer telimderi men toqtap qalǵan óndiristerdi, bos turǵan úı-jaılardy qalanyń áleýmettik-ekonomıkalyq aınalymyna tartý josparlanýda.
Al «Elektrokabel zaýyty» JSHS bolsa, jasalǵan Kelisim aıasynda qalanyń Naýryzbaı aýdanynda bir aýysymda 500 emdelýshige deıin qabyldaı alatyn emhana salyp beredi. Joba quny 1,2 mlrd. teńge.
Almaty ákimi Baýyrjan Baıbek megapolıstiń áleýmettik- ekonomıkalyq damýynda bıznestiń mańyzdy ról atqaratyndyǵyn aıta kele, bank pen kompanıa basshylyǵyna rızashylyǵyn bildirdi.
«Memleket basshysy Nursultan Nazarbaevtyń halqymyzdyń áleýmettik ahýalyn jaqsartý týraly tapsyrmasy aıasynda biz óte mańyzdy sharany uıymdastyryp otyrmyz. Álemniń órkenıetti, damyǵan elderi qataryna qosylý jónindegi Elbasynyń aldymyzǵa qoıyp otyrǵan mindetterin oryndaý úshin memleket, bıznes jáne úkimettik emes uıymdar birigip jumys istese, tıimdilik te arta túsedi», - dedi Baýyrjan Baıbek.
Esterińizge sala keteıik, Almaty qalasynyń ákimdigi buǵan deıin «Kazkommersbank» AQ, «ATFBank», «Bank Astany» jáne «Avtogaz Treıd» JSHS-men kelisimderge qol qoıǵan bolatyn.
Derekkóz: Qazaqparat
