ALMATY. QazAqparat - Búgin Almatyǵa Avstrıadan arnaıy bıznes-delegasıa keldi. Basty maqsat - eki el arasyndaǵy ekonomıkalyq baılanystardy nyǵaıtý.
Vena ekonomıkalyq palatasynyń prezıdenti Valter Rýk bastap kelgen delegasıa quramynda týrızm, ónerkásip, logıstıka, ár túrli zerthanalyq zertteýler, energetıka jáne ekonomıkanyń basqa da salalarynda qyzmet atqaratyn kásipkerler bar.
«Biz 30-dan astam avstrıalyq kompanıanyń ókilderin alyp keldik. Olar qazaqstandyq bıznesmendermen kezdesip, kelissózder júrgize alady. Biz úshin basty baǵyttar - bul týrızm jáne tehnologıa. Sonymen qatar aramyzda Vena týrısik mektebiniń ókilderi bar. Olar qazaqstandyq áriptesterimen bilim salasy boıynsha yntymaqtastyq ornatqysy keledi. Kóptegen kompanıa ókilderi birinshi ret kelip otyr. Sondyqtan ázirge naqty kelisimsharttar týraly aıtý erte. Biz eń aldymen olarǵa Qazaqstandy tanystyrýymyz kerek», - dedi V.Rýk.
Ol sonymen qatar qoqystardy kádege jaratý, sý tazartý, jylýmen qamtamasyz etý sekildi baǵyttar boıynsha avstrıalyq kompanıalardyń tájirıbesi joǵary ekendigin aıtyp, mysal retinde Vena ortalyǵyndaǵy qoqys órteıtin súzgili qondyrǵy jaıynda áńgimeledi.
«Qazaqstannyń ekonomıkany ártaraptandyrý boıynsha memlekettik mańyzǵa ıe jospary bar. Sondyqtan avstrıalyq kompanıalar temirjol, elektr jelisi, teńiz porttaryn keńeıtý, áleýmettik turǵyn úı salý sekild baǵyttar boıynsha jaqsy seriktes bola alady. Budan basqa, «EKSPO-2017» halyqaralyq kórmesi men 2017 jylǵy qysqy Ýnıversıada oıyndary eki el arasyndaǵy yntymaqtastyqty nyǵaıtýǵa jańa serpin bere alady. Al Eýrazıalyq ekonomıkalyq odaqtyń naryǵy men artyqshylyqtary avstrıalyq kásipkerlerdi Qazaqstan ekonomıkasyna ınvestısıa jumsaýǵa yntalandyra túsedi», - dedi ekonomıkalyq palata basshysy.
Al qazaqstandyqtar Eýropalyq Odaqtyń naryǵyna ený úshin Avstrıany ınvestısıalyq alań retinde paıdalana alady. Óıtkeni, kóptegen halyqaralyq uıymdar men zertteý ınstıtýttarynyń shtab-páterleri osy elde ornalasqan. Sonymen qatar Avstrıanyń qarjylyq naryǵy, týrızm salasy jáne ınfraqurylymy jaqsy damyǵan.
«Árıne, Batys Eýropa álemdegi eń básekeli orta ǵoı. Eger qandaı da bir qazaqstandyq kásiporyn bul naryqqa engisi kelse, onda ol tabysty ári naryq ózgeristerine ıkemdi boly tıis», - dedi V.Rýk.
Aıta ketelik, Qazaqstanda búgingi tańda túrli salada 50 avstrıalyq kompanıa qyzmet atqarady.
Derekkóz: Qazaqparat
