ALMATY. QazAqparat - Qazaqstannyń energetıkalyq kesheni aldaǵy qys maýsymyna daıyn. Bul týraly búgin Almatyda TMD elektr energetıkalyq keńesiniń 48-shi otyrysynda QR Energetıka vıse-mınıstri Baqytjan Jaqsalıev málim etti.
«Bizdiń energetıkalyq júıemizdiń syıymdylyǵy joǵary jáne tranzıttik áleýetke ıe, Ortalyq Azıa elderiniń energetıkalyq júıesin Reseıdiń energetıkalyq júıesimen baılanystyrady. Osylaısha, TMD elderiniń energetıkalyq júıesi birlestiginiń mańyzdy sýbektisi bolyp tabylady», - dedi B.Jaqsalıev.
Onyń aıtýynsha, otandyq energetıka júıesi aldaǵy qys maýsymyna daıyn. Elektr qýatyn túrlendirgish nysandar qalypty jumys istep jatyr, otynnyń jetkilikti qory jasaldy jáne energetıkalyq kásiporyndardy gazben úzdiksiz qamtamasyz etiletin bolady.
«Degenmen, biz qatal kontınenttik klımat aıasynda ómir súremiz ǵoı. Sondyqtan jelilerdiń tońazýy sıaqty jaǵdaılardy joqqa shyǵarýǵa bolmaıdy. Biraq jaýapty qyzmetter mundaı máselelerdi barynsha tez sheshýge daıyn», - dedi ol.
Budan basqa, Baqyt Jaqsalıev elimizde myqty qýat qory jasalǵandyǵyn jetkizdi. Ol 22-24 paıyzdy quraıdy.
«Bul rezerv el ekonomıkasyn 2025 jylǵa deıin turaqty túrde damytýǵa jetkilikti. Biraq biz munymen toqtap qalmaýymyz kerek. Qazir energetıkany damytý jóninde elimizde jańa baǵdarlama ázirlenip jatyr. Ol jańa qýat kózderine, sonyń ishinde atom energıasyna negizdeletin bolady. Onyń ústine Qazaqstan ýran óndirý boıynsha úlken áleýetke ıe», - dedi B.Jaqsalıev.
TMD elderiniń beıindi vedomstvolary men uıymdary jetekshileriniń otyrysynda qysqa daıyndyq jóninde baıandamalar oqyldy. Sondaı-aq yntymaqtastyq, memleketaralyq elektr jelilerine kútim jasaý, jóndeý jáne basqa da máseleler talqylandy.
