QYZYLORDA. QazAqparat - Búgin Qyzylordada XIII respýblıkalyq «Qazaqstannyń qala qurylysy forýmy» ótti, dep habarlady oblystyq ákimdiktiń baspasóz qyzmeti habarlady.
Oǵan elimizdiń túkpir-túkpirinen qurylysshylar, oblystardyń sáýlet jáne qala qurylysy basqarmalarynyń basshylary, qalalardyń bas sáýletshileri, ınjenerler, jobalaýshy kásiporyndar men dızaınerler qatysty. Forým aıasynda jyldyń eń úzdik sáýlet jáne qala qurylystyq jobalary kórsetilgen kórme de uıymdastyryldy.
Alqaly jıynnyń ashylý saltanatynda sóz sóılegen oblys ákimi Qyrymbek Kósherbaev sońǵy jyldary qala men aýdan ortalyqtarynyń sáýlettik kelbeti aıtarlyqtaı ózgergenin aıtty.
- Eýroposentrıstik kózqarastaǵy adamdar kóshpendiler meken etken Uly dalada «qala bolmaǵan» degen pikirdi alǵa tartady. Bul árıne, qasań qaǵıda. Máselen, Qazaq handyǵy tusynda Syr boıynda 32 qala bolǵan. Tek qazirgi Qyzylorda oblysynyń aýmaǵynda tórt astananyń tarıhta izi qalǵan. Ata-babalarymyzdyń ıgi dástúrin jalǵastyrýdy paryz sanap, Syrdarıanyń sol jaǵalaýyna jańa qala salyp, el qondyrýdy murat etip otyrmyz. Buǵan deıin shaharymyz Syrdyń oń jaǵalaýynda damyǵan bolatyn. Al negizinen sol jaǵalaýdy ıgerý týraly nyq sheshimge kelýimizge Elbasynyń erligi áser etti. Memleket basshysy Esildiń jaǵasynda boı kótergen Astana qalasyn álemniń kórikti qalalarynyń birine aınaldyrdy. Biz de Astanaǵa qarap boı túzep, Syrdyń sol jaǵalaýynda 90 myń halyq turatyn jańa qalanyń qurylysyn bastamaqpyz. Sondaı-aq, jańa qalanyń sáýletinde shyǵys stıline, ulttyq naqyshqa basymdyq beriledi, - dedi Q.Kósherbaev.
Aıta keteıik, sońǵy jyldary Qyzylorda óńiri qarqyndy qurylys alańyna aınaldy. Oblysta bıyl qurylys kólemi 3,5 esege ósti. Al Qyzylorda qalasynda 8 esege artty. Bolashaqta Syrdyń bas shahary darıanyń sol jaǵalaýynda qanat jaımaq. Qazirdiń ózinde darıanyń eki betin jalǵaıtyn kópirdiń qurylysy júrip jatyr.
Qazaqstan qala qurylysshylar odaǵynyń prezıdenti Lúbov Nysanbaevanyń aıtýynsha, endigi jerde qala qurylysynyń damýynda Syrdarıa ózeniniń Astana qalasyndaǵy Esil ózeni sıaqty tabıǵı tartymdylyǵy basym bolady.
Budan bólek, forýmǵa qatysýshylar Syr jerindegi qalalardyń tarıhyna kóz júgirtip, Baıqońyr qalasynyń týrısik áleýetin talqyǵa saldy. Sondaı-aq Qazaqstan qalalarynyń sáýlettik erekshelikterin sóz etti.
Derekkóz: QazAqparat
