TARAZ. QazAqparat - Jýaly aýdanyndaǵy Boraldaı aýyldyq okrýginiń Ertaı aýylynda, Halyq qaharmany, general-leıtenant, QR Qarýly Kúshteriniń burynǵy Bas shtab bastyǵy, QR Parlamenti Májilisiniń depýtaty Baqytjan Ertaevtyń aýylynda jańa mektep ashyldy.
Keń synyp bólmeleri, zamanaýı akt jáne sport zaldary bar 120 oryndyq bilim mekemesiniń qurylysyn «Samǵaý» JSHS júrgizdi.

Jańa mekteptiń ashylý saltanatynda kompanıa basshysy Sovethan Myqtybekov mektep dırektory Altyn Ábdýálıevaǵa sımvoldyq kiltti tapsyrdy.

Jýalylyq jýrnalıs Gúlmıra Dembaevanyń aıtýynsha, osy aýyldyń túlegi Halyq qaharmany, general-leıtenant Baqytjan Ertaev aýyldastary úshin kóptegen ıgilikti sharalarǵa muryndyq bolyp júr. «Ol óziniń týǵan jeri Jýalyǵa kelgen saıyn jańa bir isti ala keledi. Sońǵy birneshe jyldyń ishinde Ertaı aýylynda bizdiń jerlesimiz meshit pen baq, ardagerler aleıasyn salýǵa kómektesti, aýyldan shyǵar jerde arka qurylysyn qarjylandyrdy. Onyń kómegimen jáne belsendi qoldaýymen kópirler men joldar jóndeldi, myna mektep salyndy», - dep túsindirdi G.Dembaeva.

Sonymen birge sońǵy kelgen joly B.Ertaev aýyldastarymen birge bulaqtardy tazartyp,  kózin ashty. «Qamys basyp ketken arnalardyń tynysy keńip, móldir bulaqtardan syldyrap sý aqty», - dedi jýalylyq jýrnalıs.

 «Mundaı izgi bastamalar óskeleń urpaq úshin jaqsy úlgi, - dep atap kórsetti Jýaly aýdanynyń ákimi Batyrbek Qulekeev. - Al taza bulaq sýy aýdanymyzdyń ıgiligine aınaldy».

«Sý qaıda bolsa, ómir - sonda, - dedi B.Ertaev. - Muny bizdiń ata-bablarymyz jaqsy bilgen. Móldir bulaq sýy shól qandyrýmen birge, onyń quramynda kóptegen paıdaly qasıet bar. Búginde tushshy sýdyń zaryn tartyp otyrǵan elder bar, sondyqtan da bul qazir álemdik problemaǵa aınaldy. Memleket basshysynyń «Aq bulaq» baǵdarlamasyna bastamashy bolýy kezdeısoq emes. Bizdiń aýyldastarmen birge atqarǵan isimiz jastarymyzǵa da juǵysty bolsa degen tilek bar».

Oblystyq bilim basqarmasynyń málimetteri boıynsha, Jýaly aýdanynda 42 mektepte 10 829 bala bilim alýda. 

Derekkóz: Qazaqparat