ORAL. QazAqparat - Batys Qazaqstan oblysynda sábı súıetin jastaǵy 3655 áıel bolsa, sonyń 241-i - 15-18 jas aralyǵyndaǵylar. Bul týraly oblys ákiminiń orynbasary Baqtıar Mákenniń tóraǵalyǵymen ótken BQO ákimi janyndaǵy áıelder isteri jáne otbasylyq-demografıalyq saıasat jónindegi komısıa otyrysynda oblystyq densaýlyq saqtaý basqarmasy basshysynyń orynbasary Nurjamal Jumaǵulova málim etti.
Onyń aıtýynsha, osy áıelderdiń 1590-y nemese 43,5 paıyzy - ekinshi toptaǵy múgedekter. Olarǵa medısınalyq kómek sapasyn jaqsartý maqsatynda emdelýshiler monıtorıńi júıesi jetildirilýde. Bıylǵy tamyzdan bastap barlyq medısına mekemelerinde quramynda reabılıtolog, emdeý-dene shynyqtyrý nusqaýshysy, ergoterapevt, psıholog jáne sylaýshy bar arnaıy toptar quryldy. Olar ár emdelýshini saýyqtyrý úshin jeke baǵdarlama jasaýy kerek. Sondaı-aq júktilikten saqtanýshylar otbasyny josparlaý kabınetterinde aqyl-keńes pen tegin quraldar ala alady.
Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń málim etkenindeı, óńirdegi múgedek áıelder arasynda psıhıkalyq-júıke aýrýlary men qaterli isikke shaldyqqandar az emes. Sondyqtan olarǵa erekshe kóńil bólý qajet-aq. Aldaǵy jyldyń basynan múgedekterge «bir tereze» qaǵıdaty boıynsha qyzmet kórsetiletin bolady.
Balalar aýla klýbtarynyń otbasy qundylyqtaryn nyǵaıtý men jas jetkinshekter tárbıesindegi róli jóninde habarlama jasaǵan Oral qalasy ákiminiń orynbasary Mars Satybaldıevtiń sózine qaraǵanda, mundaı jumystar júıeli júrgizilýde. Shaharda 37 myń bala bolsa, sonyń 12 myńy 17 aýla klýbynda bos ýaqyttaryn mándi ótkizýde. Jas jubaılar arasynda ajyrasýshylardyń kóbeıýine baılanysty jumysqa ornalasý, turǵyn úı alý, óz kásibin bastaý, balalar demalysyn uıymdastyrý baǵytynda qundy derekter usynatyn kitapshalar shyǵaryp, taratý qolǵa alyndy.
Aýyldyq jerlerde múgedek áıelderdi saýyqtyrý baǵytyndaǵy jumystar jóninde Zelenov jáne Bókeı ordasy aýdany ákiminiń orynbasarlary Rafılbek Amanjol men Larısa Qaıyrǵalıeva málimet berdi.
Jıyn sońynda B.Máken múgedekter, sonyń ishinde áıelder nazardan tys qalmaı, olarǵa únemi qoldaý-kómek kórsetilýi qajet ekendigin atap kórsetti. Osy oraıda sala basshylary men qala, aýdandar ákimdikterine tıisti tapsyrmalar berildi.
Derekkóz. qazaqparat
