AQTAÝ. QazAqparat - Mańǵystaý oblysynyń qalalary men eldi mekenderin damytýǵa 1 mlrd. teńgeden astam qarjy baǵyttalmaq. Bul týraly óńir ákimi Alık Aıdarbaev besinshi saılanǵan oblystyq máslıhattyń 28-shi sesıasynda málim etti, onyń barysynda depýtattar 2015-2017 jyldarǵa arnalǵan Mańǵystaý oblysynyń búdjetine ózgerister engizý jáne naqtylaý jónindegi usynysty biraýyzdan qoldady.
Birqatar basymdyqty shyǵyndarǵa búdjet qarajatyn qaıta bólý jergilikti búdjettiń kiris bóligin 1 mlrd.-tan astam teńgege ulǵaıtýdyń esebinen múmkin boldy.
Aqtaý qalasynyń ákimdigi qalalyq máslıhattyń qoldaýymen 600 mln. teńgeden astam qarjyny negizgi kósheler men qıylystardy abattandyrýǵa, shaǵynaýdandar arasyndaǵy joldardy jóndeýge, kóshelerdi jaryqtandyrýǵa, sonyń ishinde merekeli kúnderi sándik kórkemdeý jumystaryna, sondaı-aq jańa shaǵyn aýdandardaǵy joldar men ınjenerlik jelilerdi salý jumystaryn jalǵastyrýǵa jumsaýdy uıǵardy. Sondaı-aq qoqys jınaıtyn konteınerler, 23 birlik arnaıy tehnıka - qoqys tasıtyn jáne qar tazalaıtyn mashınalar satyp alynady.
Qarajattardyń bir bóligi aýyldardyń ınfraqurylymyn damytýǵa jumsalady.
«Jergilikti atqarý organdary úshin aýyldardy qajetti ınjenerlik komýnıkasıalarmen qamtamasyz etý árqashan da basymdyqty másele bolyp keledi. Osy qarajattar esebinen Munaıly aýdanyndaǵy Batyr aýylyn elektrlendirý jumystary jalǵastyrylady. Aýyldyń serpindi damýyn halyq sany ósýinen baıqaýǵa bolady. Jyl basynan beri aýyl turǵyndarynyń sany 1500 adamnan 2700-ge deıin ósti, buǵan ishki kóshi-qon men tabıǵı ósimniń joǵarylaýy sebep boldy. Mysalǵa, ótken jyly mekteptegi oqýshylar sany 511 adam bolsa, bıylǵy 1 qyrkúıekten munda 924 bala oqıdy», - dep atap ótti Mańǵystaý oblysynyń ákimi Alık Aıdarbaev.
Sonymen qatar oblys búdjetin naqtylaý Túpqaraǵan aýdanynyń Saıyn Shapaǵatov aýylyn gazdandyrý jumysyn jalǵastyrýǵa 225 mln. teńgedeı aqsha bólýge múmkindik berdi. Jyl basynan beri Aqshuqyr jáne Saıyn Shapaǵatov aýyldarynda elektr jelisin tartýǵa, gazdandyrýǵa, sýmen jabdyqtaýǵa 2 mlrd. teńgeden astam búdjettik ınvestısıalar bólindi.
Sesıada atap kórsetilgendeı, kiriske túsken barlyq qarjy qaıta bólýden keıin jańa ınvestısıalyq jobalarǵa emes, buryn bastalǵan jumystardy jalǵastyrýǵa jumsalmaq. Al jańa bastamalarǵa qatysty aıtar bolsaq, eń qajetti jobalar ǵana (mektep qurylysy, balabaqshalar, densaýlyq saqtaý nysandary) qarjylandyrylatyn bolady.
Derekkóz: Qazaqparat
