QYZYLORDA. QazAqparat - Búgin «Nur Otan» partıasy Tóraǵasynyń Birinshi orynbasary Asqar Myrzahmetov jumys saparymen Qyzylorda oblysynda boldy.
Aldymen oblys ákimdiginiń ahýaldyq ortalyǵynda oblystyq partıa aktıvimen kezdesip, aldaǵy jumys baǵyttaryn talqylady. Májiliske qala men aýdandardan barlyǵy 400 nurotandyq selektorlyq baılanys arqyly qatysty. Partıa belsendilerimen kezdesý barysynda A.Myrzahmetov óńirdegi bastaýysh partıa uıymdaryna asa mán berilip, jergilikti fılıaldardaǵy qyzmetkerler sany 43 paıyzǵa-ǵa, ıaǵnı 358 adamǵa artqanyn aıtty.
- Shaǵyn jáne orta bıznesti damytýdy partıalyq baqylaýǵa alǵaly otyrmyz. Sebebi ol halyqty jumyspen qamtamasyz etýge mol múmkindik beredi. Qazirgi daǵdarys jaǵdaıynda biz osyǵan basymdyq berýimiz kerek,- degen Asqar Myrzahmetov Syr óńirinde jasalyp jatqan jumystarǵa oń baǵasyn berdi. - «Jalpy Qyzylorda oblysynyń damý qarqyny ózge óńirlerge úlgi bolarlyqtaı. Elbasynyń Syr óńirine sapary aıasynda Qyzylorda oblysyna bergen joǵary baǵasy osynyń aıǵaǵy», -dedi ol.
Oblys ákimi Qyrymbek Kósherbaev «Nurly jol» baǵdarlamasynyń júzege asyrylý barysyn baıandap, daǵdarys jaǵdaıynda ekonomıkany ártaraptandyrýǵa jáne jumys oryndaryn saqtap qalýǵa basty nazar aýdarý kerektigine toqtaldy.
- Bizdiń eń basty mindetimiz - bar jumys oryndaryn saqtap qalyp, jańa jumys oryndaryn ashýǵa jaǵdaı jasaý. Qazirgi ekonomıkalyq jaǵdaı Nur Otanǵa burynǵydan da joǵary kúsh júkteıdi. Sondyqtan, úreıdi - úkili úmitke, sekemdi - seıilge aınaldyrý kerek, - dedi oblys ákimi Q.Kósherbaev.
Jumys sapary barysynda A.Myrzahmetov vagon jóndeý deposynda boldy. Jumysshylarmen kezdesip, kásiporynnyń jumysymen tanysty. 80 jyldyq tarıhy bar temir joldyń tozǵan vagondaryn qalypqa keltiretin bul óndiris ornynda qazir 405 adam jumys istese, onyń 228-i «Nur Otan» partıasynyń múshesi.
Múnan soń qonaqtar «Óndiris» ındýstrıaldy aımaqqa at basyn burdy. 50 gektar aýmaqty alyp jatqan shyny zaýytynyń qurylysymen tanysty. Zamanaýı tehnologıaǵa negizdelgen bul óndiris orny kúnine 600 tonna shyny tabaqshasyn shyǵarýǵa qýatty. Qazir qurylys jumystary qarqyndy júrgizilýde. Zaýytqa qajet qoıma salynyp, 100-den astam adam jumys istep jatyr. Josparǵa sáıkes óndiris ornyn 2017 jyly iske qosý kózdelip otyr. Shyny zaýytynyń ónimderi jańa tehnologıa boıynsha óndiriletin bolady. Sondyqtan, onyń eksporttyq áleýeti da joǵary bolmaq.
Derekkóz: Qazaqparat
