ASTANA. QazAqparat - 27 qazan kúni Almatyda Á. Qasteev atyndaǵy QR Memlekettik óner mýzeıinde Atyraý oblystyq Sh. Sarıev atyndaǵy kórkemsýret jáne sándik-qoldanbaly óner mýzeıi qorynan «Aqjaıyq jaǵalaýy syr shertedi» atty kórmeniń ashylý saltanaty ótedi.
Bul týraly Á.Qasteev atyndaǵy memlekettik óner mýzeıiniń baspasóz qyzmeti habarlady.
Atyraý oblystyq Shaımardan Sarıev atyndaǵy kórkemsýret jáne sándik-qoldanbaly óner mýzeıi oblys ákimdiginiń 1992 jylǵy sheshimine sáıkes ashyldy.
1999 jyly mýzeıge derbes ǵımarat berý týraly sheshim qabyldandy. Al 2005 jyly mýzeıge jerlesimiz, sýretshi, Qazaqstan Respýblıkasy Sýretshiler odaǵynyń múshesi Sh. Sarıevtyń esimi berildi. Qazirgi tańda mýzeı oblystaǵy mádenı-aǵartý ortalyǵy bolyp tabylady. Mýzeıdiń alýan túrli koleksıasy Atyraý oblysy kórkem mádenıetiniń ótkeni men búgingisin tanystyrady. Mýzeı qorynda 1600-ge jýyq jádiger bar.
«Aqjaıyq jaǵalaýy syr shertedi» atty kórmesinde keskindeme sheberleriniń tamasha týyndylary usynylyp otyr.
Kórmeniń basty maqsaty - aımaqtar arasyndaǵy mádenı baılanysty nyǵaıtý, mýzeı isin damytý. Atyraý oblystyq Shaımardan Sarıev atyndaǵy kórkemsýret jáne sándik-qoldanbaly óner mýzeıiniń qory Almaty qalasy men qala qonaqtaryna qazaq halqy rýhanı mádenıetiniń qundylyqtarymen tanysýyna mol múmkindik beredi.
Kórmege ár túrli janrdaǵy 40 týyndy qoıyldy.
Janábil Rahmetov, Muhıt Kalımov, Gúlfaırýs Ysmaıylovanyń jáne taǵy basqalardyń týyndylary portret óneriniń keremet úlgileri bolyp tabylady. Olar sýret keıipkerin dálme-dál beıneleıdi. Ol úshin ár sýretshi tıisti sheshim taýyp, keıipkerine qorshaǵan ortamen salystyra otyryp minezdeme beredi.
Qambarbek Amanov, Jolaman Aralbaev, Rafael Slekenovtiń týyndylarynda aýyl ómiri keńinen beınelengen. Dástúrli túrde kúnniń batýy, aǵashtar, qudyqtar men shópter, ósimdikterdiń jarylýy, jerdiń dirildeýi sekildi peızajǵa aýysady.
Amandos Aqanaev, Ádilhaıyr Jantasov, Erbolat Sherýenovtiń týyndylary ata-babalar dástúrin negizge ala otyryp, týǵan ólke tarıhyn álemge tanytady.
Sádir Káribaı, Otarbaı Kendir, Qabdol Dosnıazov, Anatolıı Bajanov syndy sýretshilerdiń týyndylarynda otbasylyq jylylyq pen týystyq qatynastardy, salt-dástúrlerdi beıneleı otyryp, rýhanı ári turmystyq sıpatta týǵan jerdiń keıpin sıpattaıdy.
Kórmege arqaý bolǵan - sýretshilerdiń týǵan jerge, Atyraý qalasyna, Aqjaıyqqa degen súıispenshiligi. Osy toptamadaǵy sýretter kógildir jáne sarǵysh qońyr túspen berilgen. Qala jáne qala mańynyń tolassyz ózgerip jatqan ajary jańa áserler men jańa maqsattardy týǵyzady.
«Aqjaıyq jaǵalaýy syr shertedi» atty kórmesin usyna otyryp, Atyraý oblystyq Sháımardan Sarıev atyndaǵy kórkemsýret jáne sándik-qoldanbaly óner mýzeıi aldaǵy ýaqytta da Á. Qasteev atyndaǵy Memlekettik óner murajaıymen baılanysyn jalǵastyryp, óziniń shyǵarmashylyq laboratorıasyn jáne tutastaı Qazaqstan óneriniń «sheberhanasyn» baıytady dep senedi.
Derekkóz: QazAqparat
