Aqtaý mańynda bolǵan ushaq apatynan tiri qalǵan Azerbaijan Airlines stúardessasy Aıdan Ragımlı ázirbaıjandyq buqaralyq aqparat quraldaryna oqıǵanyń qalaı bolǵanyn aıtyp berdi.

Stúardessa Aıdana Ragımlı Groznyıdyń ústinde ushyp kele jatqanda syrttan soqqy jasalǵanyn, jarylysty estigenin aıtty.

"Birinshi soqqydan keıin ottegi maskalary ashyldy, al jolaýshylarǵa kómektesýge tyrysqanda, ekinshi soqqyny estidik", – dedi ekıpaj múshesi.

Sondaı-aq ol áýe kemesinde ottegi balony jaryldy degen nusqaǵa óz pikirin bildirdi.

"Biz ushaqtyń artqy bóligine baryp, bortserikterge arnalǵan orynda otyrdyq jáne ottegi maskalaryn taqtyq. Men áriptesime alǵashqy kómek kórsettim. Biz aǵa bortserikpen únemi baılanysta boldyq. Synyqtar ushaqqa tıdi. Ottegi sısternasynyń jarylýy týraly aqparat durys emes. Ondaı bolǵan jaǵdaıda, biz tiri qalmas edik. Kózimdi ashyp, qaıda ekenimdi suraǵanymda, maǵan Aqtaýda ekenimdi aıtty", – dedi Aıdan Ragımlı.

Ushaq apatynan tiri qalǵan ekinshi bortserik Zulfuǵar Ásadovtiń aıtýynsha, ushaqtaǵy shtattan tys jaǵdaı apattyq qonýǵa deıin de bastalǵan eken. 

«Biz tańǵy saǵat 8-de Groznyıǵa ushtyq. Qonýǵa jaqyndaǵan kezde áýejaıdy óte qalyń tuman basqanyn kórdik. Kapıtan ushaqty tómendetýge kiristi, biraq nashar kóriný saldarynan ekinshi aınalymǵa ushýǵa májbúr boldy, tumannyń seıilýin kútti. Degenmen, ekinshi de, úshinshi de qoný áreketteri sátsiz aıaqtaldy», – deıdi ol.

Onyń aıtýynsha, ushqysh jaqyn mańdaǵy áýejaıǵa baǵyt alýdy uıǵarǵan, biraq qonar aldynda ushaq syrtynan dybystar estilgen.

«Biraq sol sátte ushaqtyń syrtynan birtúrli dybys estildi. Men áriptesim Aıdanmen birge dereý salonǵa shyqtym. Biz jolaýshylar arasynda dúrbeleń bastalǵanyn kórdik. Barynsha jolaýshylardy tynyshtandyrýǵa tyrystyq», – dep tolyqtyrdy bortserik.