Abaı oblysynda «Aýyldyq densaýlyq saqtaýdy jańǵyrtý» ulttyq jobasy aıasynda aýyldyq jerlerde 62 medısınalyq-sanıtarlyq alǵashqy kómek kórsetý nysandarynyń qurylysy aıaqtaldy. Qazirgi ýaqytta medısınalyq uıymdardyń balansyna berý prosesi júrgizilýde. Bıyl taǵy eki nysan aıaqtalady. Sonymen qatar, «Aýyl – el besigi» baǵdarlamasy aıasynda Úrjar aýdany Úrjar aýylynda kúndizgi stasıonarmen 50 adam qabyldaıtyn dárigerlik ambýlatorıa salý jobasy iske asyrylýda.

Densaýlyq saqtaý basqarmasynyń basshysy Talǵat Moldabekov aýyldyq jerlerde kadr tapshylyǵy baǵytynda da belsendi jumys júrgizilip jatqanyn atap ótti.

«Bıyl kadr tapshylyǵy máselesin sheshý úshin 8,5 mln teńge kóleminde birjolǵy kóterme járdemaqy bólýdi qarastyrý josparlanýda. Biz 2025 jyly áleýmettik qoldaý sharalary qoldanylatyn asa tapshy mamandyqtardyń tizbesin anyqtaý boıynsha jumysty jalǵastyramyz. Kadrlardy daıarlaýǵa da erekshe kóńil bólinýde. Jergilikti búdjet qarajaty esebinen oblystan 80 maman 2024 jyly shetelde oqýdan ótti. Olardyń ishinde Reseı, Germanıa jáne Ázirbaıjannyń jetekshi medısınalyq mekemelerinde taǵylymdamadan ótken aýdan ortalyqtarynan 15 medısına qyzmetkeri bar. Bul baǵdarlama biliktilikti arttyrýǵa jáne aýyl medısınasynyń jumysyna zamanaýı tásilderdi engizýge baǵyttalǵan» - dep atap ótti basqarma basshysy.

Aýyl turǵyndaryna medısınalyq kómektiń qoljetimdiligin arttyrý úshin oblysta 173 eldi mekendi qamtıtyn 9 jyljymaly medısınalyq keshen jumys isteıdi. 2024 jyly 64 435 turǵyn medısınalyq kómek aldy.

Aýyldyq jerlerde medısınalyq kómekti damytýdyń negizgi baǵyttarynyń biri – materıaldyq-tehnıkalyq bazany jańartý. 2024 jyly 1,3 mlrd teńgeden astam somaǵa 200 medısınalyq tehnıka satyp alyndy. 2025 jylǵa 1,2 mlrd teńgege taǵy 182 birlik tehnıka satyp alý josparlanýda.