Sońǵy 3 jylda eldegi kólikterdiń tehnıkalyq tekserýden ótkizilgenin rastaıtyn 4000-nan astam qujat jalǵan dep tanylyp, zańdy kúshin joıdy, - dep habarlaıdy Qamshy.kz 24kz-ke silteme jasap.

Sebebi osy ýaqytqa deıin kóp júrgizýshi temir tulparyn arnaıy ortalyqqa aparmaı,  qashyqtan zańsyz qujat jasatyp kelgen. Olqylyqty túzeý úshin bıyl sáýir aıynan bastap elde kólikti tehnıkalyq baıqaýdan ótkizý talaby kúsheıtiledi. Tekserý kezinde mamandar kóliktiń qujattaǵy fotosýretine qaraıdy. Eger arnaıy baǵdarlama arqyly óńdelgeni nemese belgili bir tustary ózgertilgeni anyqtalsa, tapsyrys berýshi de, ony oryndaýshy da ákimshilik jaýapkershilikke tartylady.

 Sondaı-aq tehnıkalyq baıqaý ortalyqtary kóliktiń jaramdylyǵyn rastaýǵa arnalǵan qurylǵylardyń, bilikti mamandardyń jáne jalpy standartqa saı ǵımarattyń baryn jergilikti jerdegi quzyrly organdarǵa dáleldeýi kerek. Áıtpese, olardyń qyzmeti zańsyz dep tanylady.
    «QR Tehnıkalyq baıqaý operatorlarynyń odaǵy» zańdy tulǵalar men jeke kásipkerler birlestigi qaýymdastyǵynyń prezıdenti Baýyrjan Shaıdolla:

 - 2012 jyldan bastap sol parametrler barlyǵy kirip otyr. Qazirgi buıryqpen «habarlandyrý» talaby ketedi de, «ruqsatnama» talaby keledi. Ǵımaratty kelip, tekserip, qabyldaıdy. Sodan keıin ǵana reestrge kirgizedi. Fotoshopy boldy, talapqa sáıkes kelmeıtin tehnıkalyq baıqaý qujattary anyqtaldy, - deıdi.