Petropavldyq er adam kóligin 5 mınýttan artyq qyzdyryp, aıyppul tóleýge májbúr boldy. Er adamdy polısıaǵa kórshileri ustap bergen.

Áleýmettik jelilerde taraǵan málimet boıynsha, kórshileriniń biri onyń áreketine narazy bolyp, "102" nómirine qońyraý shalyp, polısıa shaqyrǵan. Sonyń nátıjesinde kólik ıesine 5 AEK (19 660 teńge) aıyppul salynǵan. Bul jaǵdaı óńir turǵyndarynyń arasynda qyzý talqyǵa tústi. Olar mundaı aıyppuldyń ádiletsiz ekenin aıtady. Sebebi aýa temperatýrasy keıde -40 gradýsqa deıin tómendeıtin aımaqta kólikti 5 mınýtta jylytý múmkin emes deıdi. Bul turǵyda óńirdiń klımattyq erekshelikteri eskerilmegeni synǵa qaldy.

İshki ister departamenti bul talaptyń jańalyq emes ekenin, Jol júrisi qaǵıdalarynyń 20 jyldan beri bar bóligi ekenin túsindirdi. Olardyń málimetinshe, eger kólik qozǵaltqyshy qosýly kúıde 5 mınýttan artyq tursa jáne bul turǵyndarǵa qolaısyzdyq týdyrsa, kólik ıesine Ákimshilik quqyq buzýshylyq týraly 597-babynyń 1-bóligi “Kólik quraldaryn toqtatý nemese toqtap turý qaǵıdalaryn buzý” boıynsha aıyppul salynady.

Soltústik Qazaqstan oblysynyń polısıa departamenti mundaı aıyppuldardyń jappaı salynbaıtynyn, tek turǵyndardan shaǵym túsip, jetkilikti dálelder bolǵan jaǵdaıda ǵana shara qoldanylatynyn aıtty. Er adam kórshilerin osylaı "kómek bergeni" úshin keketip, alǵys bildirgen.