Aptanyń beısenbi kúni Almatydaǵy qabyldaý Úıinde Jazýshylar odaǵy basqarmasynyń uıymdastyrýymen Qazaqstannyń Halyq jazýshysy, QR Memlekettik syılyǵynyń laýreaty, kórnekti tarıhshy, qoǵam qaıratkeri Muhtar Muqanuly Maǵaýındi eske alýǵa arnaǵan as berildi. Shara barysynda jazýshynyń 350 dana «Altyn orda» atty kitaby jurtshylyqqa taratyldy.

Aldymen halqymyzdyń ejelgi dástúri boıynsha Qazaqstan musylmandar dinı basqarmasynyń naıb ımamy Kenjeǵazy marquumnań rýhyna quran baǵyshtap, qadirmendi aqsaqal Sarbas Aqtaev aq batasyn arnaǵan. Qazaqtyń asa kórnekti klasık jazýshysy Muhtar Maǵaýınniń rýhyna arnalǵan asty Jazýshylar odaǵynyń basqarma tóraǵasy, Qazaqstannyń eńbek sińirgen qaıratkeri Mereke Qulkenov ashyp, Muhtar Maǵaýın syndy san qyrly tulǵanyń shyǵarmashylyǵy men ómiri jaıly tolǵana aıtyp berdi. 

Osydan keıin kúıshi, kompozıtor, Qazaqstannyń eńbek sińirgen qaıratkeri Shámil Ábiltaı M.Maǵaýınniń rýhyna arnap shyǵarǵan kúıin kópshilik nazaryna usynǵan. 

Muhańnyn rýqyna arnalǵan shara barysynda aqyn, QR Memlekettik syılyǵynyń laýreaty, Qazaqstannyń Eńbek sińirgen qaıratkeri,«Otan» ordeniniń ıegeri Nurlan Orazalın,Qazaqstannyń eńbek sińirgen qaıratkeri, jazýshy, «Bıbi-Ana» qaıyrymdylyq qorynyń prezıdenti Bıbigúl Imanǵazına, QR Memlekettik syılyǵynyń laýreaty, jazýshy Turysbek Sáýketaev, ádebıet zertteýshi, fılologıa ǵylymdarynyń doktory, profesor Janǵara Dádebaev, bıologıa ǵylymdarynyń doktory, profesor Blok Sháıkenovtar sóz alyp, marqumnyń kúrderi de kórnekti shyǵarmashylyq ǵumyry týrasynda, qaıtalanbas eńbekteri jaıly tebirene estelikter aıtty.

Dastarhan basynda Abaı oblysynan arnaıy kelgen oblystyq máslıhattyń tóraǵasy Shalqar Baıbekov, Qazaqstan Jazýshylar odaǵynyń múshesi, Abaı atyndaǵy oblystyq ámbebap kitaphanasynyń dırektory Mereı Qart sóz alyp, jerlesteriniń kóńil aıtýyn jetkizgen. Asta sol sıaqty jazýshy, Qazaqstan Jazýshylar odaǵynyń hatshysy Júsipbek Qorǵasbek, aqyn, belgili qoǵam jáne memleket qaıratkeri Ámirjan Qosanov, belgili aqyn, halyqaralyq «Alash» ádebı syılyǵynyń laýreaty Qorǵanbek Amanjolov, jazýshy, «Qurmet» ordeniniń ıegeri, halyqaralyq «Alash» ádebı syılyǵynyń laýreaty Naǵashybek Qapalbekuly, Qazaqstannyń Halyq ártisi, memlekettik syılyqtyń eki márte ıegeri, akter Dosqan Joljaqsynovtar sóz alyp, Muhańmen birge óktkizgen umytylmas sátter jaıly jan tebirenter estelikter aıtty.

Astyń sońyna qaraı osy sharany ótkizýge demeýshilik jasaǵan belgili mesenattar Beket Turǵaraev pen Medǵat Quljanov ortaǵa shyǵyp, qazaqtyń tarıhy men ádebıetin, jalpy ult rýhanıatyn órkendetýge ólsheýsiz úles qosqan dara tulǵa jaıynda estelik aıtyp, qalamgerdiń ekinshi ǵumyry máńgilik bolatynyna senim bildirdi. Muhtar Maǵaýınniń uly – Maǵjan ıyqtaryna túsken aýyr júkti bólisip, qaıǵylaryna ortaqtasqan qazaq halqyna, asqa arnaıy kelip kóńil aıtyp jatqan jurtshylyqqa otbasy atynan alǵysyn jetkizdi.