Speedtest Global Index 2024 jylǵy jeltoqsan aıynyń qorytyndysyn shyǵaryp, eń jyldam ınterneti bar elder men qalalardyń reıtıńin jarıalady.

Jańa zertteýde mamandar 154 eldiń 200-ge jýyq qalasyndaǵy mobıldi ınternet pen keńjolaqty jeliniń ortasha jyldamdyǵyn taldap shyqqan.

Aıta keteıik, Speedtest Global Index baǵalaý krıterıılerine aqparatty júkteý men joldaý jyldamdyǵy kiredi. Baǵalaý kezinde mobıldi jáne keńjolaqty jeliler esepteledi.  

Sonymen álemdik servıs málimetteri boıynsha, mobıldi ınternet jyldamdyǵy boıynsha Qazaqstan bir satyǵa kóterilip, 57-orynǵa jaıǵasty. Ortasha júkteý jyldamdyǵy – 53,76 megabıt/sekýnd. Al 58-orynda Japonıa tur (53,54 megabıt/sekýnd).  

Alaıda keńjolaqty ınternet jyldamdyǵy boıynsha Qazaqstannyń reıtıńi tómen, naqty aıtqanda elimiz álem boıynsha 88-orynda tur (ortasha jyldamdyq – 73,67 megabıt/sekýnd).  

Mobıldi ınternet jyldamdyǵy boıynsha kósh bastap turǵan úsh el:  

1. Birikken Arab Ámirlikteri – 453,87 megabıt/sekýnd;
2. Katar – 383,5 megabıt/sekýnd;
3. Kýveıt – 257,3 megabıt/sekýnd.

Eń tómengi kórsetkish taǵy da Aýǵanstanda tirkeldi. Munda júkteý jyldamdyǵy bar bolǵany 8,2 megabıt/sekýnd.

Al qalalarǵa keletin bolsaq, elimizdege ınterneti eń jyldam qala - Almaty (93.71 megabıt/sekýnd). Bul tusta ol 2 satyǵa tómendep ketkenin aıta keteıik. Al Astana reıtıńte 2 satyǵa kóterilip, 71-orynǵa turaqtaǵan (83.87 megabıt/sekýnd).

Bir qyzyǵy keńjolaqty ınternet boıynsha jaǵdaı kerisinshe, ıaǵnı Astana 97-orynǵa (83.88 megabıt/sekýnd) kóterilse, Almaty 103-orynda (80.21 megabıt/sekýnd) tur.  

Al álem boıynsha mobıldi ınternet jyldamdyǵy boıynsha kelesi qalalar kósh bastap tur:

1. Abý-Dabı (Birikken Arab Ámirlikteri) - 527.65 megabıt/sekýnd;
2. Dýbaı (Birikken Arab Ámirlikteri) - 424.33 megabıt/sekýnd;
3. Ar-Raııan (Qatar) - 416.67 megabıt/sekýnd.