ASTANA. QazAqparat - Almaty oblysynan 55 shaqyrylýshy QR Qarýly Kúshteri Qurlyq áskerleri «Shyǵys» óńirlik qolbasshylyǵynyń áskerlerine attandyryldy.
1 qazannan bastap búkil Qazaqstan boıynsha azamattardy merzimdi áskerı qyzmetke shaqyrýdyń kúzgi shaqyrylymy ótýde. Osy kúzde 18 ben 27 jas aralyǵyndaǵy 12 myńnan asa qazaqstandyq shaqyrylýǵa jatady.
19 qazannan bastap shaqyrylýshylardyń jas tolymyn áskerlerge qyzmet etýge jiberý bastaldy.
Taldyqorǵanda qalanyń ortalyq alańynda «Shaqyrylýshy kúni» áskerı-patrıottyq aksıasy ótti. Qurlyq áskerleriniń «Shyǵys» óńirlik qolbasshylyǵynyń áskerlerine 55 shaqyrylýshy attandyryldy. İs-sharanyń jón-joralǵysy Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń jalpy áskerı jarǵylarynyń qatań talaptaryna sáıkes júrgizildi.
Aksıaǵa Almaty oblysynyń basshylyǵy men memlekettik mekemelerdiń ókilderi, qoǵamdyq ardagerlik uıymdar men birlestikter, Taldyqorǵan garnızonynyń áskerı qyzmetshileri jáne olardyń otbasy músheleri, Taldyqorǵan qalasynyń oqý oryndarynyń (mektepterdiń, kolejder men lıseılerdiń) oqýshylary, bastapqy áskerı daıyndyq oqytýshylary, áskerı-patrıottyq klýbtar men úıirmelerdiń tárbıelenýshileri, shaqyrylýshylardyń ata-analary jáne qala jastary qatysty. Shara aıasynda Qazaqstan Respýblıkasy Qarýly Kúshteriniń, basqa da áskerleri men áskreı quralymdarynyń qazirgi zamanǵy qarý-jaraǵy men kıim-keshegi, 48386 áskerı bólimi áskerı qyzmetshileriniń qoıan-qoltyq urys boıynsha kórsetilimderi, 18404, 54380, 21751, 78639 áskerı bólimderiniń kórkemónerpazdar konserti, Qazaq handyǵynyń 550 jyldyǵyna arnalǵan teatrlandyrylǵan qoıylym, sondaı-aq jastardyń fleshmoby kórsetildi.
Derekkóz: Qaz-aqparat
