ASTANA. QazAqparat - Soltústik Qazaqstan oblysyna Belarýs Respýblıkasynyń Qazaqstan Respýblıkasyndaǵy Tótenshe jáne Ókiletti elshisi Anatolıı Nıchkasov jáne Belarýs Respýblıkasynyń Qazaqstan elshiligindegi saýda-ekonomıkalyq qyzmetiniń basshysy Gennadıı Klyga keldi.
Kezdesýdi ashqan SQO ákimi Erik Sultanov delegasıa múshelerine óńirdiń ekonomıkalyq damýy jáne belarýstik kompanıalarmen ózara yntymaqtastyǵy týraly aıtyp berdi, dep habarlaıdy oblys ákimdiginiń baspasóz qyzmetinen

«Soltústik Qazaqstan oblysy - elimizdiń agrarly óńirleriniń biri. Bizde mashınajasaý salasy qarqyndy damyp keledi, biz temirjol jáne munaı-gaz salalaryna qajet jabdyqtardy shyǵaramyz. Bıznesti damytý úshin óńirimizde zor múmkindikter bar», - dedi Erik Hamzauly.

Óz kezeginde Anatolıı Nıchkasov saparynyń negizgi maqsaty yntymaqtastyq týraly usynys ekenin atap ótti.

«Biz oblystyń ekonomıkasyn zerttep, birneshe sala boıynsha yntymaqtastyq usynystaryn ázirledik. Onyń ishinde mashına jasaý salasy da bar, sebebi Belarýste bul sala jaqsy damyǵan jáne búdjetti tolyqtyrýdyń negizgi kózi bolyp otyr», - dedi Anatolıı Ivanovıch.

Sondaı-aq kezdesýde temirjol jabdyqtarynyń óndirisi, elektrdi oqshaýlandyrý materıaldary, aýyl sharýashylyǵy tehnıkasy, munaı-gaz jabdyqtaryn shyǵarý, et jáne sút óńdeý salalary boıynsha yntymaqtastyq jaıynda usynystar aıtyldy.

Kezdesý sońynda Belarýs Respýblıkasynyń QR-daǵy Elshiligi jáne Soltústik Qazaqstan oblysy ákimdigi arasynda ózara túsinistik týraly memorandýmǵa qol qoıyldy.

2015 jyldyń qańtar-tamyz aılarynda Soltústik Qazaqstan oblysy men Belarýs memleketiniń taýar aınalymy 6,2 mln AQSH dollaryn qurap otyr. Óńirdiń aýyl sharýashylyǵy taýar óndirýshilerimiz sońǵy 7-8 jyl aıasynda Belarýs Respýblıkasynyń mashınajasaý kásiporyndarymen tyǵyz qarym-qatynas ornatqan.

2014 jyldyń qarasha aıynda Soltústik Qazaqstan oblysynyń delegasıasy ekonomıkalyq ókildik aıasynda saýda-ekonomıkalyq jáne ónerkásiptik yntymaqtastyq qatynas qurý úshin Mınsk qalasyna bardy.

Derekkóz: Qaz-aqparat