ALMATY. QazAqparat - Qazaqstanda 2018 jyldan bastap ǵarysh apparattary óndirisi tolyqqandy iske qosylady. Bul týraly búgin Almatyda «Ionosfera ınstıtýty» enshiles jaýapkershiligi shekteýli seriktestiginde ótip jatqan Halyqaralyq «Aldyńǵy qatarly ǵaryshtyq zertteýler men tehnologıalar» ǵylymı-tájirıbelik semınar-otyrysy barysynda QR Investısıalar jáne damý mınıstrligi Aeroǵarysh komıteti tóraǵasynyń orynbasary Meıirbek Moldabekov málim etti.
Onyń aıtýynsha, osy maqsatta Astana qalasynyń mańynda Qazaqstannyń jańa Ulttyq ǵaryshtyq zertteýler jáne tehnologıalar ortalyǵy qurylatyn bolady.
«Qazir bul jerde ǵaryshtyq tehnıkalar men apparattardy qurastyrýshy-synaq kesheni salynyp jatyr. Bul TMD aýmaǵynda teńdesi joq keshen bolmaq. Jalpy, ortalyqtyń quramynda arnaıy konstrýktorlyq-tehnologıalyq búro, tájirıbelik óndiris jáne qurastyrýshy-synaq kesheni bolady. Bolashaqta ǵaryshtyq jobalar osy búroda ázirlenip, tájirıbelik óndiriste qurastyrylyp, qurastyrýshy-synaq kesheninde synaqtan ótkiziledi. Búro músheleriniń quramyn qazir túgendep jatyrmyz. Onyń quramyna negizinen Reseı, Ýkraına jáne basqa da shet elderde bilim alyp, Fransıa men Anglıada taǵlymdamalardan ótip kelgen otandyq jas daryndy mamandar enetin bolady», - dedi óz sózinde M.Moldabekov.
Ol sonymen qatar ázirge ortalyqtan qurastyrylyp shyǵarylatyn ǵaryshtyq tehnıkalar men apparattardyń quramdas bólikteriniń 55 paıyzy Qazaqstanda jasalatyndyǵyn jetkizdi.
«Ázirge jasandy jer serikteriniń quramdas bólikterin tolyǵymen Qazaqstanda jasaý múmkin emes. Tek 55 paıyzy óndiriledi. Munyń ózi úlken jetistik. Bul úshin fransıalyq áriptesterimizden ǵaryshtyq apparattardyń quramdas bólikterin óndirýge arnalǵan tehnologıalardy alamyz. Sóıtip, ortalyqta osy baǵytta qazaqstandyq-fransýzdyq birlesken kásiporyndar jumys isteıtin bolady. Keshen 2017 jyldyń sońyna qaraı paıdalanýǵa berilip, 2018 jyldan bastap ǵylymı ázirlemelerden bastap, daıyn ónim shyǵarýǵa deıingi búkil tehnologıalyq jeli iske qosylady», - dedi M.Moldabekov.
Aıta ketelik, atalmysh ortalyq Elbasynyń tapsyrýymen Astana qalasynyń mańynda halyqaralyq áýejaıǵa bara jatqan jolda 30 gektar jerde boı kóteredi.
Derekkóz: QazAqparat
