ASTANA. QazAqparat - Jer jannaty Jetisý óńirinde «Ǵalı Ormanov - maıtalman lırık aqyn» atty respýblıkalyq ǵylymı-tájirıbelik konferensıa ótti.
Aqyn shyǵarmashylyǵyna arnalǵan alqaly jıynnyń qurmetti qonaqtary aqynnyń qyzy Jamıǵa Ormanova men aqynnyń nemeresi boldy. Sondaı-aq, is-sharaǵa Saǵymbaı Qozybaev, Tursyn Sydyqov, Gúljahan Orda, Jetpisbaı Bekbolatuly, Nurtaza Qadyrnıazov jáne basqa elimizge tanymal qalamgerler, ádebıet zertteýshileri, aqyn murasyn nasıhattaýshylar qatysty. Konferensıa jumysy Ǵalı Ormanov pen İlıas Jansúgirov eskertkishterine gúl shoqtaryn qoıý rásiminen bastaý aldy. Kórkem sózdi qasterlegen óńirdiń stýdentteri Ǵ.Ormanov pen Táýelsizdik kósheleriniń qıylysynda 2008 jyly ornatylǵan Ǵalı aqynnyń eskertkishiniń janynda talantty tulǵaǵa arnaǵan jyrlarynan shashý shashty. Aqynnyń qyzy Jamıǵa Ormanova atalǵan bilim ordasynyń aqyn esimimen atalatyn ǵylymı kitaphanasy men ýnıversıtet murajaıyn aralap, 43 jyldyq tarıhy bar qara shańyraqtyń búgingi tynys-tirshiligimen tanysty.
2017 jyly Ǵalı Ormanovtyń 110 jyldyq mereıtoıy qarsańynda uıymdastyrylǵan jıyndy İ.Jansúgirov atyndaǵy Jetisý memlekettik ýnıversıtetiniń rektory, QR Ulttyq ǵylym akademıasynyń korespondent-múshesi Ábdimanap Bekturǵanov alǵy sóz sóılep ashty. Basqosý barysynda ál-Farabı atyndaǵy Qazaq Ulttyq ýnıversıteti, Turan ýnıversıteti, M.Áýezov atyndaǵy ádebıet jáne óner ınstıtýty, Jarkent gýmanıtarlyq-tehnıkalyq koleji men İ.Jansúgirov atyndaǵy Jetisý memlekettik ýnıversıtetiniń birqatar profesorlary aqyn shyǵarmashylyǵyna baılanysty ár túrli taqyryptarda baıandama jasap, ónegeli ómiri men shyǵarmashylyǵynan tyńdarmanǵa bir úzik syr shertti. Sondaı-aq, İ.Jansúgirov atyndaǵy Jetisý memlekettik ýnıversıtetiniń stýdentteri aqyn jyrlaryn saǵynǵan tyńdarmanǵa baldaı jyrlarynyń dámin tatqyzdy. Konferensıada aqynnyń qyzy jyly júzdesýdi uıymdastyrǵan ýnıversıtet rektoryna alǵys bildirip, oǵan Ǵalı Ormanovtyń «İlıastyń sońǵy kúnderi» jáne «Bıografıa Ilása Djansýgýrova», «Slovo ob Iláse» atty orys tilinde jazylǵan qoljazbalaryn tabys etti.
«Adamgershiliktiń bar asyl qasıetterin boıyna jınaqtaǵan ákem 1939-1945 jyldary jyr alyby Jambyldyń ádebı hatshysy, poezıadaǵy İlıastyń izbasary bolǵan. 4-5 jasar kezimde 96 jastaǵy Jambyl atamyz Kók bazardyń janyndaǵy úıimizge jıi kelip turatyny esimde. Jansaraıy qazynaǵa toly bolǵan Jambyl babamyzdyń kóńiliniń kiltin tabý ońaı sharýa bolmaǵan. Bıik báıteregimiz bolǵan ákem bizge kitap oqyńdar dep jıi aıtatyn. Asyldyǵynan aınymaǵan ol ómirde óte qarapaıym, meıirimdi, aq kóńildi, adal, jomart, janashyr jan bolǵan edi. Dál osy qasıetterimen ol aınalasyna syıly adam bolǵan. Júregimen jazǵan jyrlaryn jas urpaq jańa ǵasyrlarǵa jetkizedi dep úmittenemin», - dedi aqynnyń qyzy Jamıǵa Ormanova.
Jıyn sońynda qatysýshylar Taldyqorǵandaǵy aqyn atyndaǵy kóshede eskertkishimen irgeles turǵan №4 orta mektepke onyń esimin berý týraly óz usynystaryn bildirdi.
Aqynnyń qyzy bul kúni Taldyqorǵandaǵy İlıas Jansúgirovtiń ádebı mýzeıin jáne Almaty oblysy, Aqsý aýdanyndaǵy Qapal aýylyndaǵy Ǵalı Ormanov atyndaǵy orta mektebiniń murajaıyn aralady. Qazirgi tańda aqyn dúnıege kelgen Jetisýdyń shuraıly ólkesi Qapal aýylynda bul bilim ordasynyń mýzeıinde onyń qoljazbalary, jyr jınaqtary, marapattary, otbasymen birge túsken fotosýretteri, tutynǵan buıymdary, Dinmuhamed Qonaev syılaǵan saǵaty, Ǵabıt Músirepov tartý etken dombyrasy, Ǵabıden Mustafın estelikke bergen M.Gorkııdiń músini, Grýzıa jazýshylarynyń syılyǵy saqtalyp tur.
Derekkóz: Qazaqparat
