ALMATY. QazAqparat - Búgin Almaty qalasynyń ákimi Baýyrjan Baıbek tıisti kásiporyndardyń aldaǵy qysqy maýsymda kóshe tazartý jumystaryna daıyndyǵyn tekserdi.
Almatyda tazartylatyn kóshelerdiń jalpy uzyndyǵy 1620 shaqyrymdy quraıdy. Olardyń 65 paıyzyn «Almaty tazalyq» memlekettik komýnaldyq kásiporny tazartady. Al jalpy joldar men trotýarlardy tazartý jumysyn 17 merdiger uıym atqarady. Olarda qysqy tazartý jumystaryna 860 arnaıy tehnıǵa jumyldyrylǵan.
«Almaty Tazalyq» MKK dırektory Eldar Keldibaev arnaıy tehnıkalardyń aldaǵy qysqy maýsymǵa 100 paıyz daıyn ekendigin aıtty. Olarǵa qosymsha júkti ózi túsire beretin taǵy 300 júk kóligi tartylatyn bolady. Árbir aýdanda qum tógetin bir-bir qazanshuńqyrdan bar. Al qumdar qala kóshelerine 15 arnaıy qum tasýshy kólik arqyly sebiledi.
«Biz 9 mln. sharshy metr jerdi tazartamyz. Bul ońaı sharýa emes, Qalany bir mezette tazarta almaısyń. Qazir bul jumystar aldyn ala pysyqtalyp jatyr. Qar jaýǵannan bastap, kóshelerdi sypyra bastaımyz. Biz árbir kósheden jınalǵan qardy júk kólikterine artyp, qala syrtyna shyǵaryp tastaımyz», - dedi E. Keldibaev.
«Men jaqynda qar tastaıtyn jerlerli jáne arnaıy tehnıkalardy qaıta tekserip shyǵamyn. Jalpy qardy qala syrtyna shyǵarý jumysy qalaı uıymdastyrylǵan? Qaǵaz júzinde ǵana shyǵarasyzdar, al shyn mánisinde shyǵaryla bermeıdi. Endi qar tastalatyn jerlerge beıne kameralar ornatyp, arnaıy kezekshi qoıý kerek. Qar tasıtyn júk kólikteriniń nómirin tirkeý kerek bolady» - dedi óz kezeginde B. Baıbek.
Sonymen qatar, qala basshysy Astanada qar tazartý boıynsha atqarylar jumystardy mysalǵa keltirdi. Elordada kósheler qardan túngi ýaqytta tazartylady eken.
«Almatyda qandaı kóshelerdi birinshi bolyp tazartasyzdar? Birinshi kezekte, árıne, negizgi magıstraldar tazartylýy tıis. Kólik keptilisi kóbeıip, qarbalas sátter týyndaǵan shaqta qar tazartý jumystaryn júrgzýdiń qajeti joq. Astanada qardy túnde tazartady. Tańerteń sol tazartylǵan jolmen jumysqa barasyń», - dedi B. Baıbek.
«Men sıtýsıalyq, ıaǵnı jaǵdaıattyq kartany kórgim keledi. Sizderdiń daıyndyq deńgeılerińizdi, naqty jaǵdaılarda qalaı jumys isteıtinderińizdi bilgim keledi. Qar tastalatyn jerlerge beınekameralar ornatylyp, jumys baqylaýǵa alynýy tıis. Merdigerlik uıymdarmen aradaǵy kelisim-sharttaryńyzdy kórsetińizder. Jumysty sapasyz atqaratyn uıymdarmen kelisim-shart jasalmasyn. Eger basqa usynystaryńyz bolsa, aıtyńyzdar, talqylaımyz, - dedi B. Baıbek.
Budan basqa qala basshysy aldynda barlyq aýdan ákimderi esep berdi. Olar arnaıy tehnıkalardyń júrý baǵyttaryn túsindirdi.
Derekkóz: Qazaqparat
