Áleýmettik jelilerde "Raqmet" aıtyp sıgnal qosqany úshin aıyppul salynǵany týraly vıdeo keń taraldy. Er adamdy sıgnal qosqany úshin emes, apattyq jaǵdaı týǵyzǵany úshin jazalaǵany belgili boldy.

Qazaqstandyqtar arasynda jol bergeni úshin avarıalyq sıgnaldy qosý ádeptilik dese, biri bul apattyq jaǵdaıda ǵana qosylatyn sıgnal degen sekildi pikirler tarady. 

Sonymen "raqmet" aıtý maqsatynda avarıalyq sıgnaldy qosqany úshin aıyppul salynady ma? Jaǵdaıdy Bas prokýratýra basqarmasynyń bastyǵy Jasulan Dáýlembaev túsindirdi.

"Avarıalyq sıgnal qosqany úshin jaýapkershilik týraly aıtsaq, jolda kez kelgen suraqty qarastyrǵanda jol qozǵalysy erejeleriniń talaptaryn basshylyqqa alý kerek. Erejelerde avarıalyq jaryq sıgnalyn qosýdyń naqty jaǵdaılary kórsetilgen. Olarǵa jol-kólik oqıǵalary, toqtaýǵa tyıym salynǵan jerlerde májbúrli toqtaý, keri qozǵalys jáne taǵy basqalar jatady. Mundaı jaǵdaılardan bólek, jol qozǵalysy erejelerine sáıkes avarıalyq sıgnal basqa da jaǵdaılarda da, kólik quralynyń qaýip tóndirýi múmkin ekendigin eskertý úshin qosylýy múmkin.

Eger bireýdiń ótýine múmkindik jasap, kómekteskenińiz úshin alǵys bildirý maqsatynda sıgnal qossańyz, bul jol qozǵalysy qatysýshylaryna eskertý retinde qaralady jáne jaýapkershilikke tartylmaıdy. Bir-birińizge kómektesip, raqmet aıta berińizder!" – dep túsindirdi Dáýlembaev.