Qostanaıda týrısik qyzmet kórsetý salasynda áreket etken agenttik polıseılerdiń qadaǵalaýyna alyndy.

Shetelge týrlar uıymdastyratyn kompanıaǵa klıentterdiń jappaı shaǵymdanýy quqyq qorǵaý organdarynyń nazaryn aýdartty. Qazirgi ýaqytta polısıaǵa zardap shekkenderden 53 aryz tústi. 

Aryz ıeleri Egıpet, Túrkıa, Taıland, Vetnam jáne Qytaıǵa saıahattar úshin aldyn ala tólem jasaǵan, alaıda, ýáde etilgen qyzmetterdi ala almaǵan. Keıbiri týrlardyń qunyn tolyq tólese, basqalary ishinara tólegen. Soǵan qaramastan, aqshalary qaıtarylmaǵan ári týrlar brondalmaǵany belgili boldy. Klıentter saıahattardy agenttik keńsesine kelip nemese telefon arqyly brondaǵan. 

Tólem qolma-qol jáne banktik aýdarym arqyly júrgizilgen. Biraq ushý kúni kelgende, saıahattarǵa tapsyrystyń múlde jasalmaǵany anyqtaldy. Aldyn ala esepteýler boıynsha, keltirilgen shyǵyn kólemi 40 mıllıon teńgeni quraıdy. Agenttik ókilderi aıyptaýlarǵa jaýap retinde qarjy ıemdelmegenin, al týrlar ózindik qunymen satylǵandyqtan, osyndaı qıyndyqtar týyndaǵanyn málimdedi, - delingen aqparatta.

Polıseıler tergeý barysynda týrısik paketterge qatysty brondaýdy rastaıtyn eshqandaı qujattardyń joq ekenin anyqtady. Qazirgi ýaqytta eki nemese odan da kóp adamnyń shyǵynǵa ushyraýyna baılanysty alaıaqtyq faktisi boıynsha sotqa deıingi tergeý jumystary júrgizilýde. Kúdikti-jeke kásipker qamaýǵa alyndy, tergeý jalǵasyp jatyr. Polısıa osyndaı jaǵdaıǵa tap bolǵan barlyq azamattardy quqyq qorǵaý organdaryna habarlasýǵa shaqyrady.