Abaı oblysy kólik ınfraqurylymyn, sonyń ishinde áýe, avtomobıl jáne temirjol tasymaldaryn belsendi damytýda. Bul óńirler arasyndaǵy baılanysty jaqsartyp, týrızm men ekonomıkany órkendetýge yqpal etedi. Óńirde eki áýejaı jumys isteıdi. Semeı men Úrjardaǵy áýejaılar jolaýshylardy tasymaldaýda úlken mańyzǵa ıe.
1983 jyly salynǵan Semeı qalasynyń áýejaıy 2016-2018 jyldary qaıta jańǵyrtylǵannan keıin halyqaralyq standarttarǵa sáıkes keledi. Sonyń arqasynda zamanaýı ushaqtardy qabyldaı alady. Búginde nysan «Fly Arystan» jáne «Iýjnoe nebo» avıakompanıalarynyń Astana, Almaty jáne Úrjar baǵyttary boıynsha reısterine qyzmet kórsetedi.
2025 jyldyń naýryz aıynan bastap jolaýshylar úshin týrısik maýsym qarsańynda ushaqtardyń ushý jıiligin arttyrý jáne ushý kestesin jańartý josparlanǵan. Sondaı-aq áýejaı termınalyn qaıta jańǵyrtý úshin jobalyq-smetalyq qujattama ázirlendi. Bul ótkizý qabiletin edáýir arttyrýǵa jáne jolaýshylarǵa qolaıly jaǵdaı týdyrýǵa múmkindik beredi. Qazirgi ýaqytta áýejaıǵa múmkindigi shekteýli azamattarǵa arnalǵan ambýlatorıalyq lıft jáne jolaýshylardyń qolaılyǵy úshin avtobýs satyp alyndy.
«Abaı oblysynyń kólik ınfraqurylymyn damytý - ınvestısıa tartýǵa, jańa jumys oryndaryn qurýǵa, týrızmdi damytýǵa baǵyttalǵan. Reısterdiń kóbeıýi, áýejaılardy qaıta jańǵyrtý jáne qyzmet kórsetý sapasyn jaqsartý aımaq turǵyndary men qonaqtar úshin paıdaly. Týrısik marshrýttardy keńeıtý, avıareısterdi sýbsıdıalaý jáne ınfraqurylym nysandaryn jańǵyrtý óńirdiń turaqty damýyn jáne onyń jalpyulttyq kólik jelisine kirigýin qamtamasyz etedi», - deıdi Abaı oblysy ákiminiń orynbasary Dımıtrıı Garıkov.
1978 jyldan beri jumys istep kele jatqan Úrjar aýylynyń áýejaıy da oblys úshin mańyzdy kólik toraby bolyp tabylady. Ushý-qoný jolaǵy, jaryq-sıgnaldyq jabdyq jáne beınebaqylaý júıelerin qaıta jańǵyrtý syndy eki iri jobadan keıin áýejaı syıymdylyǵy 100 jolaýshyǵa deıingi zamanaýı áýe kemelerin qabyldaı alady. 2024 jyly jolaýshylar termınalyn qaıta jańǵyrtý úshin jobalyq-smetalyq qujattama ázirlendi. Jobany iske asyrý jolaýshylarǵa qyzmet kórsetýdi jaqsartady. Qazirdiń ózinde termınal saǵatyna 80-100 adamǵa deıin qyzmet kórsetedi. Al eseptik ótkizý qabileti 35 adam.
Jazǵy týrısik maýsymda, 2025 jylǵy 1 maýsym men 31 tamyz aralyǵynda «Scat» áýekompanıasy «Astana-Úrjar – Astana» jáne «Almaty – Úrjar – Almaty»baǵyttary boıynsha Bombardier CRJ – 200 áýe kemesi arqyly reısterdi oryndaýdy josparlap otyr.
Budan basqa, «Iýjnoe nebo» áýekompanıasy «Semeı – Úrjar – Semeı» baǵyttary boıynsha reısterdi turaqty negizde júzege asyrady.
Pikir qaldyrý