28 qańtarda úkimettiń keńeıtilgen otyrysynda prezıdent Qasym-Jomart Toqaev saılanatyn ákimder arasynda memlekettik qyzmette istemegen ári jastar kóp ekenin aıtyp, olardy daıyndyqtan ótkizý úshin “Ákimder mektebi” jobasyn qosýdy tapsyrdy.

Prezıdent atalǵan jobany iske qosý úshin osyndaı jumysty júrgizip jatqan "Amanat" partıasynyń tájirıbesin eskergen jón deıdi. 

"Alǵa qoıylǵan mindetterdi júzege asyrý úshin tutas memlekettik apparat tıimdi jumys isteýi kerek. Ákimderdi tikeleı saılaýdyń nátıjesinde memlekettik qyzmetkerlerdiń jańa sanaty – saılanatyn basshylar paıda boldy. Bul – eki jarym myńnan astam basshy laýazymyndaǵy qyzmetker degen sóz. Olardyń arasynda buryn memlekettik qyzmette jumys istemegen azamattar, sonyń ishinde jastar kóp. Sol sebepti saılanǵan ákimder men túrli deńgeıdegi basshylardy keshendi daıyndyqtan ótkizý máselesi óte ózekti bolyp tur. Úkimetke Memlekettik qyzmet isteri agenttigimen birlesip, "Ákimder mektebi" oqytý jobasyn iske qosýdy tapsyramyn. Bul rette osyndaı jumysty júrgizip jatqan "Amanat" partıasynyń tájirıbesin eskergen jón”, – dep málimdedi úkimet otyrysynda. 

Qasym-Jomart Toqaevtyń sózinshe, memlekettik apparat azamattarmen udaıy baılanysta bolýy kerek. 

“Onsyz bolmaıdy. Sondyqtan halyqtan kelip túsetin ótinishterge aıryqsha nazar aýdarý qajet. Byltyrdyń ózinde prezıdent ákimshiligine 50 myńnan astam ótinish kelip túsken, al elimizdegi barlyq memlekettik organdarǵa shamamen 4 mıllıon ótinish joldanǵan. Bul kórsetkish jyldan jylǵa kóbeıýde. Bir jaǵynan, bul jurttyń "Halyq únine qulaq asatyn memleket" tujyrymdamasyna senetinin kórsetedi. Alaıda sonymen birge, bul olardyń ótinishteri men máseleleri memlekettik organdardyń kúndelikti jumysy barysynda sheshimin tappaı jatqanyn ańǵartady. Sondyqtan olqylyqtar men kemshilikterdi joıý úshin tıanaqty jumys júrgizý qajet. Ádette azamattardyń ótinishteriniń artynda adam taǵdyry turady. Sondyqtan bul jerde barlyq quzyrly organ jumyla jumys isteýge tıis", – deıdi ol.